Amazon kompaniyasining Yaqin Sharqdagi markazlari hujumdan so'ng tiklanmoqda
Amazon kompaniyasining Yaqin Sharq mintaqasidagi bulutli xizmatlaridan foydalanuvchi mijozlar harbiy harakatlar oqibatida zarar ko‘rgan ma’lumotlarni qayta ishlash markazlari tiklanishini yana bir necha oy kutishlariga to‘g‘ri keladi. Bu haqda Zamin.uz xabar berdi.
Birlashgan Arab Amirliklari va Bahrayn hududida joylashgan Amazon kompaniyasiga qarashli uchta yirik obektga uchuvchisiz uchish qurilmalari hujum qilgan edi. Mutaxassislarning hisob-kitoblariga ko‘ra, mazkur tizimlarni to‘liq quvvatda qayta ishga tushirish uchun qariyb yarim yil vaqt talab etilishi mumkin.
Bu haqdagi ma’lumotlar xalqaro texnologik nashrlarda e’lon qilindi. Kompaniya vakillari mintaqadagi qurolli to‘qnashuvlar oqibatida server qurilmalari jiddiy talofat ko‘rganini rasman tasdiqladi.
Hozirgi vaqtda ushbu markazlar mijozlarning turli ilovalari va dasturiy ta’minotlari ishini barqaror ta’minlash imkoniyatiga ega emas. Amazon rahbariyati tizimning normal faoliyati to‘liq tiklanguniga qadar barcha turdagi hisob-kitob amaliyotlari va to‘lovlarni vaqtincha to‘xtatib turishini ma’lum qildi.
Bu choralar mijozlarning moliyaviy yo‘qotishlarini kamaytirish maqsadida amalga oshirilmoqda. Amazon Web Services bo‘linmasi o‘z mijozlariga mavjud raqamli resurslarni boshqa xavfsiz hududlardagi bulutli maydonlarga ko‘chirishni hamda ma’lumotlarning zaxira nusxalaridan foydalanishni qat’iy tavsiya etmoqda.
Masalan, Dubay shahrida faoliyat yurituvchi Careem kabi yirik korxonalar o‘z ish jarayonlarini boshqa ma’lumotlar markazlariga o‘tkazish orqali texnik uzilishlarning oldini olishga va faoliyatini tezkorlik bilan tiklashga muvaffaq bo‘ldi. Biroq barcha foydalanuvchilar ham bunday imkoniyatga ega emasligi vaziyatni murakkablashtirmoqda.
Xizmatlarni qayta tiklash uchun olti oy muddat belgilangani hujum natijasida yetkazilgan zararning ko‘lami naqadar keng ekanidan dalolat beradi. Kompaniyaning ichki hisobotlariga tayanadigan bo‘lsak, faqat bitta ma’lumotlar markazining o‘zida o‘n to‘rtta server ustuni butunlay ishdan chiqqan, yana beshtasi esa jiddiy shikastlangan.
Bunday yirik hajmdagi texnik qurilmalarni almashtirish va ularni qaytadan sozlash uzoq vaqt hamda katta mablag‘ talab qiladigan jarayondir. Mintaqadagi beqarorlik esa tiklash ishlarini yanada qiyinlashtirmoqda.
