Los Anjeles transport tizimiga kiberhujum ortida Eron xakerlari turibdi
Xavfsizlik sohasidagi mutaxassislarning ma’lumotlariga ko‘ra, joriy yilning mart oyida Los-Anjeles transport tizimiga uyushtirilgan kiberhujum ortida Eron hukumati tomonidan qo‘llab-quvvatlanadigan xakerlar turibdi. Bu haqda Zamin.uz xabar berdi.
Isroilning Gambit Sekyuriti startapi tomonidan e’lon qilingan hisobotda ta’kidlanishicha, ushbu buzg‘unchilar Eron Razvedka va davlat xavfsizligi vazirligi topshirig‘i bilan faoliyat yuritadi. Ushbu ma’lumotlar nufuzli texnologik nashrlar tomonidan tasdiqlangan.
O‘zini Ababil of Minab deb atovchi guruh mazkur hujum uchun javobgarlikni o‘z zimmasiga olgan edi. Ular transport tizimidagi muhim ma’lumotlarni o‘g‘irlab, so‘ngra ularni butunlay o‘chirib tashlaganliklarini da’vo qilishgan.
Biroq soha ekspertlari bu guruhni mustaqil harakat qiluvchi jamoa emas, balki bevosita davlat idoralariga bo‘ysunuvchi tizimning bir qismi deb hisoblamoqda. Tadqiqotchilar o‘z xulosalarini ushbu guruhning avvalgi kiberkampaniyalari va Isroil milliy kiberxavfsizlik markazi tomonidan aniqlangan dalillar bilan asoslagan.
Gambit tahlilchilari Isroil, Saudiya Arabistoni va Turkiyadagi yirik kompaniyalarga qilingan hujumlarni ham o‘rganib chiqib, ularning barchasida o‘xshash usullar qo‘llanilganini aniqlashgan. Agar ushbu tahlillar o‘z tasdig‘ini topsa, mazkur guruh Eron hukumati manfaatlarini ko‘zlab harakat qiladigan navbatdagi soxta jamoa bo‘lib chiqadi.
Bunday holatlar avval ham kuzatilgan bo‘lib, AQSH Adliya vazirligi bir necha bor xalqaro miqyosdagi kiberhujumlarda Eronni ayblab chiqqan edi. So‘nggi vaqtlarda Eron bilan aloqador xakerlik guruhlarining faolligi sezilarli darajada oshgani kuzatilmoqda.
Aprel oyida AQSH maxsus xizmatlari eronlik xakerlar mamlakatning muhim infratuzilma obektlarini nishonga olayotgani haqida rasmiy ogohlantirish bilan chiqqan edi. Bu kabi hujumlar nafaqat ma’lumotlar xavfsizligiga, balki shahar transporti kabi aholi hayoti uchun muhim bo‘lgan tizimlarning barqaror ishlashiga ham jiddiy xavf tug‘dirmoqda.
Mutaxassislar kiberxavfsizlik choralarini yanada kuchaytirish zarurligini ta’kidlamoqda.
