Nosoz avtomobil yangi modeli bilan almashtirildi
Raqobatni rivojlantirish va iste’molchilar huquqlarini himoya qilish qo‘mitasi matbuot xizmati xabariga ko‘ra, nosoz avtomobil yangi avtomobil bilan almashtirildi. Bu haqida Upl.uz xabar berdi.
Qo‘mita tomonidan o‘rganilishicha, bir fuqaro “Asacar” avtomobil salonidan 221 640 000 so‘mga “Onix Premier” rusumli avtomobil sotib olgan va dastlabki to‘lov sifatida 50 foiz to‘lagan. Avtomobilga gaz ballonini o‘rnatish uchun texnik ko‘rik o‘tkazilganda, avtomobil tanasining ayrim qismlarida bo‘yoq shikastlanishlari aniqlangan.
Bu holat yuzasidan fuqaro avtomobil saloniga murojaat qilgan, ammo ular avtomobilni yangi bilan almashtirishdan bosh tortgan. Fuqaroning qo‘mitaga murojaati natijasida, “UzAvto Motors” aksiyadorlik jamiyati ishtirokida holat o‘rganilib, nosozlik mavjudligi tasdiqlandi.
Tekshiruv yakunida avtomobil salonining iste’molchiga yangi avtomobil taqdim etgani va avtomobil bilan bog‘liq jami 10 500 000 so‘m miqdoridagi xarajatlarni qoplagani ma’lum qilindi. Bu holat iste’molchilar huquqlarining himoyasi va sifatli xizmat ko‘rsatish muhimligini yana bir bor isbotladi.
