Geely kompaniyasi Toyota Camry modeliga raqib bo‘ladigan arzon sedan chiqardi
Geely kompaniyasi jahon avtomobil bozorida katta qiziqishga sabab bo‘ladigan yangi modelini taqdim etdi. Bu haqda Zamin.uz xabar berdi.
Uzunligi deyarli besh metrni tashkil etuvchi Galaxy Star 7 nomli yangi gibrid sedan rasman sotuvga chiqarildi. Ushbu avtomobil o‘zining o‘lchamlari va texnik imkoniyatlari bilan Toyota Camry hamda Avalon kabi mashhur modellarga munosib raqib bo‘lishi kutilmoqda.
Eng asosiysi, yangi sedan narx borasida ancha jozibador taklif bilan chiqdi. Masalan, Toyota Camry modelining gibrid talqini ancha qimmat hisoblansa, Geely Galaxy Star 7 narxi 15 000 dollardan 19 500 dollargacha etib belgilangan.
Bu esa mazkur toifadagi avtomobillar uchun juda hamyonbop ko‘rsatkichdir. Avtomobilning texnik imkoniyatlari ham yuqori darajada shakllantirilgan.
U zamonaviy gibrid tizimi bilan jihozlangan bo‘lib, uning tarkibiga 1,5 litrli benzinli dvigatel va kuchli elektromotorlar kiradi. Mashinaning orqa uzatmali talqini 301 ot kuchiga ega bo‘lsa, to‘liq uzatmali versiyasi 425 ot kuchigacha quvvat bera oladi.
Shuningdek, avtomobilga o‘rnatilgan akkumulyator faqat elektr energiyasining o‘zida 230 kilometrgacha masofani bosib o‘tish imkonini beradi. Bu ko‘rsatkich shahar ichida yonilg‘isiz harakatlanish uchun juda qulaydir.
Galaxy Star 7 tashqi ko‘rinishi va o‘lchamlari bilan ham ajralib turadi. Uning g‘ildiraklar bazasi kengligi salonda yo‘lovchilar uchun katta qulaylik yaratadi.
Avtomobilning yurish qismi zamonaviy osma tizimlar bilan ta’minlangan bo‘lib, u hatto yuqori tezlikda kutilmagan favqulodda holatlar yuz berganda ham yo‘lda barqarorlikni saqlab qolish xususiyatiga ega. Bu esa haydovchi va yo‘lovchilar xavfsizligini yangi bosqichga olib chiqadi.
Mashina ichki qismi ham zamonaviy texnologiyalar va hashamatli materiallar bilan bezatilgan. Salonda shovqinni kamaytiruvchi ikki qavatli oynalar, turli ranglarda jilolanuvchi ichki yoritish tizimi hamda yuqori sifatli audiotizim o‘rnatilgan.
Haydovchi uchun barcha ma’lumotlar raqamli panellar va katta sensorli ekranlar orqali ko‘rinib turadi. Old o‘rindiqlar isitish, sovutish va massaj qilish funksiyalari bilan jihozlangan bo‘lsa, orqa o‘rindiqlarda yo‘lovchilar uchun maxsus yig‘iluvchi stollar mavjud.
Bundan tashqari, avtomobil mustaqil boshqaruv va o‘zini o‘zi to‘xtash joyiga joylashtirish kabi aqlli tizimlarga ham ega.
