Chery kompaniyasi Yaponiya bozori uchun yangi Emta brendiga asos soldi
Omoda va Jaecoo brendlarining egasi hisoblangan Chery kompaniyasi Yaponiyaning murakkab va o‘ziga xos avtomobil bozorini zabt etishni maqsad qilgan. Bu haqda Zamin.uz xabar berdi.
Buning uchun Xitoyning ushbu yirik avtosanoat giganti Osiyoning to‘rtta nufuzli kompaniyasi bilan hamkorlik o‘rnatdi va Emta deb nomlangan yangi elektromobil brendiga asos soldi. Mazkur loyihada Chery kompaniyasi asosiy texnik hamkor sifatida ishtirok etib, yangi avtomobillar uchun platformalar va butlovchi qismlarni yetkazib berish bilan shug‘ullanadi.
Bu haqda xalqaro nashrlar xabar bermoqda. Emta brendi ostida ishlab chiqariladigan birinchi model Yaponiyaning qat’iy me’yorlariga mos keladigan, uzunligi 3,4 metr bo‘lgan ixcham shahar avtomobili bo‘ladi.
Hozircha nomi sir tutilayotgan ushbu model Chery kompaniyasining elektr uzatmalari va Gotion batareyalari bilan jihozlanishi ko‘zda tutilgan. Yangi elektromobil Yaponiya bozorida o‘z o‘rniga ega bo‘lgan Honda N-Box, Nissan Sakura, Daihatsu Tanto va Suzuki Hustler kabi mashhur modellar bilan jiddiy raqobatga kirishishi kutilmoqda.
Texnik ko‘rsatkichlariga ko‘ra, yangi ixcham avtomobil Chery kompaniyasining Xitoy bozoridagi eng kichik modeli hisoblangan QQ Ice Cream bilan o‘xshash bo‘lishi taxmin qilinmoqda. Ma’lumotlarga ko‘ra, mashina 27 ot kuchiga ega dvigatel va bir marta quvvatlanishda taxminan 160 kilometr masofani bosib o‘tish imkonini beruvchi akkumulyator bilan ta’minlanadi.
Sotuv jarayonlarini Autobacs Seven kompaniyasi amalga oshirsa, Anest korxonasi mahsulot sifatini nazorat qilish uchun mas’ul bo‘ladi. Dastlabki bosqichda ushbu avtomobillar Xitoydagi Jiangsu Yueda zavodida yig‘iladi.
Agar yangi brendning bozordagi debyuti muvaffaqiyatli kechsa, kelajakda ishlab chiqarish jarayonini bevosita Yaponiyaning o‘zida tashkil etish rejalashtirilgan. Shuningdek, 2029-yilga qadar Emta brendi ostida yana uchta yangi model, jumladan, kichik krossover va ko‘p maqsadli oilaviy mashinalar ishlab chiqarish mo‘ljallanmoqda.
Hozirgi vaqtda Emta brendini Yaponiya hududidan tashqariga olib chiqish rejalashtirilmagan. Chery ushbu loyihada asosan aksiyador va texnologik hamkor sifatida qatnashmoqda.
Shu tariqa, Xitoy avtosanoati vakillari BYD kompaniyasidan so‘ng Yaponiya bozorining salmoqli qismini tashkil etuvchi ixcham avtomobillar segmentida o‘z mavqeini mustahkamlashga harakat qilmoqda.
