«Toyota» va «Nissan» AQSH yig‘ilgan avtomobillarning sifat kamchiliklari haqida ogohlantirdi
Yaponiya avtosanoatining ikki yirik giganti — Toyota va Nissan kompaniyalari o‘z mamlakati iste’molchilarini AQSHdagi zavodlarda yig‘ilgan avtomobillarning o‘ziga xos kamchiliklari borligi haqida rasman ogohlantirdi. Bu haqda Zamin.uz xabar berdi.
Ushbu bayonot yapon brendlarining xorijdagi ishlab chiqarish standartlari va ichki bozor talablari o‘rtasidagi farqni ochiq tan olishi sifatida baholanmoqda. Gap shundaki, hozirda Yaponiya bozoriga import qilinayotgan Toyota Tundra, Toyota Highlander va Nissan Murano modellari Amerika zavodlarida yig‘iladi.
Ishlab chiqaruvchilar ushbu modellar uchun ilova qilingan hujjatlarda ularning yig‘ilish sifati Yaponiya ichki bozori uchun odatiy bo‘lgan qat’iy standartlardan farq qilishi mumkinligini ko‘rsatib o‘tgan. Toyota kompaniyasi o‘z mijozlarini avtomobil kuzovining bo‘yoq qatlamidagi ehtimoliy noqsonlar haqida ogohlantirmoqda.
Hususan, AQSHdan keltirilgan mashinalarda bo‘yoq qatlami yupqaroq bo‘lishi, turli qismlar orasida rang tafovuti sezilishi, jilo berish izlari yoki hatto mayda dog‘lar uchrashi mumkinligi aytilgan. Shunga qaramay, brend vakillari bu kamchiliklar faqat estetik xarakterga ega ekanini va texnik xavfsizlikka ta’sir qilmasligini ta’kidlagan.
Nissan esa bu borada yanada ochiqroq pozitsiyani egalladi. Kompaniya Nissan Murano modelida detallar orasidagi choklarning notekisligi, germetik izlari va kuzov panellarining bir-biriga mos tushishidagi kichik og‘ishlar bo‘lishi mumkinligini tan oldi.
Bu kabi holatlar odatda yaponiyalik xaridorlar uchun qabul qilib bo‘lmas darajadagi nuqsonlar hisoblanadi. Sifatdan tashqari, ushbu avtomobillarning dasturiy ta’minotida ham jiddiy cheklovlar mavjud.
Masalan, Toyota Tundra modelidagi yo‘l belgilarini aniqlash tizimi Yaponiya infratuzilmasida xatoliklar bilan ishlashi mumkin. Shuningdek, multimedia tizimi faqat ingliz tilini qo‘llab-quvvatlaydi, bu esa mahalliy haydovchilar uchun noqulaylik tug‘diradi.
Nissan Murano modelida esa vaziyat yanada murakkabroq. Interfeysda yapon tili mavjud emas.
Mahalliy radiostansiyalar chastotalari qo‘llab-quvvatlanmaydi. Yaponiya bozoriga xos bo‘lgan Nissan Connect onlayn xizmatlari ishlamaydi.
Ushbu holat yaponiyalik avtomobil ixlosmandlasi va ommabop axborot vositalari o‘rtasida qizg‘in muhokamalarga sabab bo‘ldi. Ekspertlarning fikricha, Toyota va Nissan kabi brendlarning bunday ochiq bayonoti AQSHdagi ishlab chiqarish madaniyati va Yaponiya ichki bozoridagi o‘ta yuqori talablar o‘rtasidagi tafovutni yaqqol ko‘rsatib bermoqda.
O‘zbekiston bozorida ham ushbu modellar, ayniqsa Toyota Highlander va Nissan Murano juda ommabop hisoblanadi. Mamlakatimizga ko‘pincha AQSH yoki BAA bozoridan keltiriladigan ushbu avtomobillarni xarid qilishda foydalanuvchilar yuqorida qayd etilgan yig‘ish sifati va dasturiy ta’minot xususiyatlarini inobatga olishlari tavsiya etiladi.
