Raqamli hujjatlarni tan olish masalasida davlat idoralari o'rtasida bahs chiqdi
O‘zbekistonda haydovchilik guvohnomasi, pasport va ID-kartalarning raqamli shakllarini tan olish masalasida ikki davlat idorasi o‘rtasida jiddiy bahs yuzaga keldi. Bu haqda Zamin.uz xabar berdi.
O‘zkomnazorat inspeksiyasi elektron hujjatlar yetarli ekanini ta’kidlayotgan bir paytda, Ichki ishlar vazirligi Yo‘l harakati xavfsizligi xizmati buni inkor etib, eski tartibga tayanmoqda. Ushbu huquqiy tushunmovchilik millionlab haydovchilarni qiziqtirmoqda.
Vaziyat O‘zkomnazorat inspeksiyasi tomonidan tarqatilgan videolavhadan boshlandi. Unda haydovchilar bundan buyon yo‘l-patrul xizmati xodimiga hujjatlarni telefon orqali, elektron shaklda ko‘rsatishi kifoya ekani aytilgan edi.
Ko‘p o‘tmay, Yo‘l harakati xavfsizligi xizmati bunga rasmiy raddiya berib, haydovchilar baribir hujjatlarning plastik yoki qog‘oz shaklidagi aslini olib yurishi shartligini bildirdi. Biroq soha mutaxassislari Yo‘l harakati xavfsizligi xizmati o‘z raddiyasida hukumat qarorining eski tahriridan foydalanganini aniqladi.
Vazirlar Mahkamasining joriy yil 21-maydagi qarori bilan amaldagi qoidalarga muhim o‘zgartirish kiritilgan bo‘lib, u 22-maydan kuchga kirgan. Yangi qoidaga ko‘ra, hujjatlarning maxsus mobil ilovalardagi raqamli shakli ko‘rsatilganda, ularning qog‘oz yoki plastik nusxalarini ichki ishlar organlari xodimlari tomonidan talab etilishi taqiqlangan.
Bu yerda Ma’muriy javobgarlik to‘g‘risidagi kodeks va Hukumat qarori o‘rtasida ziddiyat mavjud. Kodeksda hali ham haydovchi hujjatlarni o‘z yonida olib yurishi shartligi va bunga amal qilmaslik jarimaga sabab bo‘lishi yozilgan.
Yuridik kuch jihatidan kodeks hukumat qaroridan ustun turadi. Ammo mamlakatimizda barcha qonunlardan ustun turuvchi Oliy qonun — Konstitutsiya mavjud.
Konstitutsiyaning 20-moddasiga ko‘ra, qonunchilikdagi barcha noaniqliklar va ziddiyatlar davlat organlari emas, inson foydasiga talqin etilishi shart. Shuningdek, Bosh qomus oliy yuridik kuchga ega va u to‘g‘ridan-to‘g‘ri amal qiladi.
Demak, huquqiy jihatdan fuqaro telefondagi hujjatni ko‘rsatganda unga jarima solish noqonuniy hisoblanadi. Raqamli hujjatlar qog‘oz shakli bilan tenglashtirilganiga ancha vaqt bo‘lgan bo‘lsa-da, mas’ul idoralar hanuzgacha eski tartibni talab qilishda davom etmoqda.
Agar soha rahbarlarida xohish va tashabbus bo‘lganida, o‘tgan vaqt ichida Ma’muriy kodeksga ham tegishli o‘zgartirishlar kiritilib, bu qulaylik hayotga to‘liq tatbiq etilgan bo‘lar edi. Tizimni raqamlashtirishdagi sustkashliklar va zamonaviy texnologiyalarni joriy etishdagi muammolar aholi uchun ortiqcha qiyinchiliklar tug‘dirmoqda.
