«Audi» kompaniyasi afsonaviy «A2» modelini elektromobil sifatida qaytardi
Germaniyaning mashhur Audi kompaniyasi o‘z davrining eng o‘ziga xos va bahsli modellaridan biri bo‘lgan Audi A2 avtomobilini yangi elektr formatida qayta ishlab chiqarishga qaror qildi. Bu haqda One.uz xabar beradi.
Ushbu ixcham xatchbekning qaytishi shunchaki o‘tmishga ehtirom emas, balki zamonaviy aerodinamika talablariga asoslangan strategik qadamdir. Yangi elektromobil o‘zidan oldingi nusxaning alyuminiy kuzovidan voz kechgan bo‘lsa-da, uning samaradorligi va o‘ziga xos qiyofasi saqlab qolindi.
Mazkur model ixcham elektromobillar bozorida munosib o‘rin egallashi kutilmoqda. Aerodinamik shakl va zamonaviy texnologiyalar 2000-yillarning boshlarida taqdim etilgan ilk Audi A2 modeli o‘ta ilg‘or aerodinamikasi va yengil konstruksiyasi bilan tanilgan edi.
Biroq o‘sha davrda qo‘llanilgan murakkab texnologiyalar avtomobil narxini keskin oshirib yuborgan va u kutilgan tijoriy muvaffaqiyatga erisha olmagan edi. Bugungi kunga kelib, nemis brendi mutlaqo boshqacha yondashuvni tanladi.
Muhandislar oldiga mavjud krossoverlardan ko‘ra kichikroq, ixcham va quvvatni imkon qadar tejaydigan zamonaviy transport vositasi yaratish vazifasi qo‘yildi. Mutaxassislarning ta’kidlashicha, xatchbek korpusini havo qarshiligi qonuniyatlari asosida mukammallashtirish mantiqan aynan A2 modeliga xos siluetni qayta tiklashga olib keldi.
Avtomobilning old qismi pastroq qilib loyihalashtirilgan, tom chizig‘i esa orqaga qarab tomchi shaklida yakunlanadi. Bu yechim havo qarshiligini keskin kamaytiradi va yurish masofasini uzaytiradi.
Orqa qismdagi bo‘lingan oynalar esa avtomobilning retro uslubini saqlab qolgan holda, unga zamonaviy ko‘rinish bag‘ishlagan. Yangi Audi A2 E-tron modeli Volkswagen guruhi tasarrufidagi ommaviy MEB platformasining so‘nggi modifikatsiyasiga asoslangan.
Bu qaror ishlab chiqarish tannarxini maqbul darajada saqlab qolishga va yaqinda ishlab chiqarishdan olingan A1 hamda Q2 modellari o‘rnini munosib to‘ldirishga xizmat qiladi. Texnik samaradorlik va quvvat tizimi Yangi platforma o‘zi bilan bir qator muhim texnik yangiliklarni olib keldi.
Jumladan, batareyalar uchun an’anaviy nikel-marganets-kobalt tarkibi o‘rniga litiy-temir-fosfat elementlari tanlandi. Bu haydovchilarga batareyani har safar yuz foizgacha xavotirsiz quvvatlash imkonini beradi, chunki bunday elementlar uzoq muddatli foydalanishga ancha chidamli hisoblanadi.
Bundan tashqari, avtomobil yangilangan elektr dvigateli bilan jihozlangan. Muhandislar maxsus moylash tizimi va yupqalashtirilgan materiallar yordamida mexanik yo‘qotishlarni minimallashtirishga erishdilar.
Tishli g‘ildiraklarning aylanishi paytidagi qarshilik kamaytirilgani hisobiga elektromobilning umumiy samaradorligi sezilarli darajada oshdi. O‘lchamlari bo‘yicha Volkswagen ID 3 modeliga yaqin turuvchi ushbu yangi Audi A2 premium toifadagi ixcham elektromobillar bozorida kuchli raqobat hosil qilishi kutilmoqda.
