Pekin atrofidagi hududlarda yuzaga kelgan kuchli yomg‘ir va toshqinlar ikki kishining hayotiga zomin bo‘ldi, minglab odamlar xavfsiz joylarga ko‘chirilmoqda. Bu haqida Zamin.uz xabar berdi.
Mamlakat hukumati kuchli yog‘ingarchilik natijasida yer ko‘chkisi va suv toshqinlari xavfi yuzaga kelgani haqida ogohlantirishlar bermoqda. Rasmiy ma’lumotlarga ko‘ra, Hebey viloyatida ikki kishi halok bo‘lgan, yana ikki kishi bedarak yo‘qolgan.
Ayniqsa, Fuping tumanida kechasi soatiga 145 millimetr yog‘ingarchilik qayd etilgan, bu hudud uchun rekord ko‘rsatkich hisoblanadi. Xitoy Suv resurslari vazirligi Pekin, Hebey va boshqa to‘qqiz viloyatda kichik va o‘rta daryolarda suv toshqinlari hamda tog‘ daryolarining toshib ketishi xavfi borligi haqida maxsus ogohlantirishlar berdi.
Pekin yaqinidagi Miyun tumani eng ko‘p zarar ko‘rgan hududlardan biri bo‘lib, ayrim qishloqlarda elektr energiyasi va aloqa uzilgan. Mahalliy radiostansiyalarning xabar berishicha, uch mingdan ortiq kishi ushbu hududdan evakuatsiya qilingan.
Meteorologik kuzatuvlarga ko‘ra, kuchli yomg‘irlar yaqin soatlarda davom etadi. Miyun atrofidagi ba’zi hududlarda olti soat ichida 100 millimetrdan ortiq yog‘ingarchilik kutilmoqda, bu esa pastlik hududlarda suv to‘planish xavfini kuchaytiradi.
Shanba kuni Pekin hokimiyati kuchli yog‘ingarchilik sababli yer ko‘chkisi, loy va toshqinlar xavfi darajasini oshirdi. Baoding shahrida bir kechada yiliga mo‘ljallangan yog‘in miqdori — 540 millimetr — atigi sakkiz soatda yog‘ib tushdi.
Bu shahar uchun o‘rtacha yillik yog‘ingarchilikdan ham yuqori ko‘rsatkichdir. Natijada 46 mingdan ortiq kishi zarar ko‘rdi, 4655 kishi evakuatsiya qilindi.
So‘nggi yillarda Xitoyning odatda qurg‘oqchil bo‘lgan shimoliy hududlarida yog‘ingarchilik ko‘paymoqda. Ba’zi mutaxassislar bu holatni global isish bilan izohlamoqda.
Shu bilan birga, kuchli yomg‘inlar mamlakat infratuzilmasi, ayniqsa eskirgan toshqinlarga qarshi himoya tizimlari uchun jiddiy sinov bo‘lmoqda. Bu hodisa millionlab odamlarning hayotiga tahdid solmoqda va Xitoy qishloq xo‘jaligi sektoriga 2,8 trillion dollardan ortiq zarar yetkazmoqda.
