Germaniya chegaralarida noqonuniy o‘tishlar ko‘paymoqda
Iyul oyida Germaniya politsiyasi g‘arbiy chegaralarda, xususan Fransiya, Luksemburg va Belgiya orqali noqonuniy o‘tishga urinishlarning 4000 dan ortig‘ini aniqladi. Bu haqida Zamin.uz xabar berdi.
Ushbu holatlarning 2573 tasi aynan Fransiya orqali Reynland-Pfals va Saar federal yerlariga kirishga urinayotgan shaxslarga tegishli bo‘ldi. Tekshiruvlar davomida noqonuniy o‘tishga uringanlarning bir qismi o‘z davlatlariga qaytarildi: 1364 kishi Fransiyaga, 869 kishi Luksemburgga va 132 kishi Belgiyaga deportatsiya qilindi.
Bu ko‘rsatkichlar faqat iyul oyining ma’lumotlarini o‘z ichiga oladi, yakuniy statistikalar esa hali e’lon qilinmagan. Germaniya federal politsiyasining ma’lumotlariga ko‘ra, chegara nazorati vaqtida 144 nafar kontrabandachi qo‘lga olindi, shuningdek, 480 kishi order asosida hibsga olindi.
2024 yil 16 sentyabrdan boshlab Germaniya barcha chegaralarida vaqtinchalik nazoratni qayta joriy qildi. Ichki ishlar vaziri Aleksandr Dobrindt bu nazorat rejimining sentyabrdan keyin ham davom etishini ma’lum qildi.
Bu chora-tadbirlar noqonuniy migratsiyani kamaytirish va chegara xavfsizligini ta’minlashga qaratilgan.
