Trampning qo‘lidagi krem sog‘ligi haqida savol tug‘dirdi
AQSH prezidenti Donald Trampning sog‘ligi bilan bog‘liq masalalar yana keng jamoatchilik e’tiborida turibdi. Bu haqida Zamin.uz xabar berdi.
The Daily Beast nashrining xabar berishicha, uning qo‘lida qo‘llangan tonal kremning qalin qatlami aniq ko‘zga tashlangan. Ma’lumotlarga ko‘ra, prezident aynan shu krem yordamida qo‘lida ko‘kargan joylarni yashirishga harakat qilmoqda.
22 avgust kuni Vashingtonda o‘tkazilgan “The People’s House” tadbirida 79 yoshli Oq uy rahbari ishtirok etdi. Tadbirda olingan suratlarda uning o‘ng qo‘li makiyaj bilan qoplangani va krem tabiiy teri rangidan farq qilgani ko‘rinib turdi.
Kuzatuvchilar fikricha, Tramp tadbir davomida qo‘lini chap qo‘li bilan berkitishga intildi, ammo bu holat omma oldida yana ko‘zga tashlandi va jurnalistlar orasida muhokamalarga sabab bo‘ldi. Avvalroq ham prezidentning qo‘li bir necha bor e’tibor markaziga tushgan edi.
Oq uy bu holatni ko‘p marta qo‘l siqish natijasi va yurak-qon tomir kasalliklarining oldini olish uchun muntazam aspirin qabul qilish bilan izohlagan. Oq uy matbuot kotibi Kerolayn Levittning ta’kidlashicha, “Prezident Tramp har kuni minglab amerikaliklar bilan ko‘rishadi va tarixdagi ko‘plab davlat rahbarlariga qaraganda ko‘proq qo‘l siqadi.
Uning xalqqa xizmat qilishga sadoqati o‘zgarmasligicha qolmoqda”. Shu bilan birga, iyul oyida shifokorlar Trampga surunkali venoz yetishmovchilik tashxisi qo‘yilganligi ma’lum bo‘ldi.
Bu kasallik, odatda, keksa yoshdagilar orasida ko‘p uchraydi va qon tomirlarda shish va dog‘lar paydo bo‘lishiga sabab bo‘ladi. Biroq Oq uy rasmiylari so‘nggi oylarda jurnalistlarning prezident sog‘ligi va davolash jarayoni haqidagi savollariga aniq javob bermayapti.
Eslatib o‘tamiz, bahor oylarida doktor Shon Barbabella Trampning an’anaviy tibbiy ko‘rik natijalarini e’lon qilib, uning sog‘lig‘ini jismoniy va aqliy jihatdan a’lo darajada deb baholagan edi. Shunga qaramay, oxirgi oylarda olingan suratlar va ommaviy chiqishlar prezidentning sog‘ligi haqida yangi savollarni yuzaga keltirmoqda.
