Xitoyda o‘yin qaramligiga qarshi yangi terapiya boshlanmoqda
Xitoyda professional kibersportchilarni tayyorlash bilan shug‘ullanuvchi klub o‘yin qaramligiga qarshi noodatiy usulni joriy qildi. Bu haqida Zamin.uz xabar berdi.
Hebey provinsiyasida 2018 yilda tashkil etilgan ushbu klub egasi Su Chenxao dastlab sportchilarni chempionlikka yetaklashni maqsad qilgan. Biroq vaqt o‘tishi bilan u ko‘pchilik yoshlarning o‘yinlarga haddan tashqari berilib, o‘qish va hayotdagi muammolardan qochishga urinayotganini payqadi.
Klub orqali hozirgacha taxminan 4000 nafar bola o‘tgan, ularning 85 foizi onlayn o‘yinlarga qaramlik darajasiga yetganligi aniqlangan. Bu holat ularning kundalik hayoti va ta’limiga salbiy ta’sir ko‘rsatmoqda.
Su Chenxao fikricha, o‘yin muhiti shunchalik bosimli bo‘ladiki, ko‘plab yoshlar uchun o‘qishdan ko‘ra o‘yin o‘ynash qiyinroq tuyuladi. Shu sababdan u maxsus “o‘yindan voz kechish” kursini ishlab chiqdi.
Terapiya dasturining narxi tanlangan muddatga qarab farq qiladi. Bir haftalik kurs bir necha yuz dollarni tashkil etsa, 22 kunlik davolash taxminan 1400 dollar atrofida.
Mashg‘ulotlar oddiy tartibda o‘tadi: qatnashchilar ertalab soat to‘qqizdan tungacha kompyuter oldida bo‘lishadi, faqat tushlik va jismoniy mashqlar uchun tanaffus beriladi. Su Chenxao aytishicha, kiberkarera qilishni istagan yoshlarning ba’zilari dastlabki kunlarda stressga uchraydi, hatto yig‘lab ketadiganlari ham bo‘lgan.
Xitoyda bunday markazlar keng tarqalgan. Masalan, Sichuan provinsiyasidagi kibersport klubi so‘nggi sakkiz yil ichida 700 nafar o‘quvchini qabul qilgan, biroq faqat uch nafari professional darajaga erishgan.
Mutaxassislarning hisob-kitoblariga ko‘ra, kiber o‘yinchi sifatida tanilish ehtimoli 120 mingdan bir kishiga to‘g‘ri keladi. Bu holat yoshlarni o‘yinlarga haddan tashqari berilishdan himoya qilish va ularni to‘g‘ri yo‘naltirish zarurligini ko‘rsatadi.
