Belgiya sentabrda Falastinni rasmiy tan oladi
Belgiya hukumati sentabr oyida bo‘lib o‘tadigan BMT Bosh Assambleyasida Falastin davlatini rasmiy tan olishini e’lon qildi. Bu haqida Zamin.uz xabar berdi.
Bu haqda mamlakat tashqi ishlar vaziri Maksim Prevo ma’lum qildi. Unga ko‘ra, Belgiya bu qaror bilan Buyuk Britaniya, Fransiya, Kanada va Avstraliya kabi mamlakatlar qatoriga qo‘shiladi.
Shu bilan birga, Isroilga nisbatan qat’iy sanktsiyalar joriy etilishi kutilmoqda. Bu sanktsiyalar orasida G‘arbiy sohildagi yahudiy posyolkalaridan mahsulot importini taqiqlash va sud jarayonlarini boshlash imkoniyati mavjud.
Isroil tashqi ishlar vazirligi va Belgiyadagi elchixona hozircha bu xabarga munosabat bildirmadi. Avvalroq Isroil tashqi ishlar vazirligi Londondagi Falastinni tan olish rejasini “HAMAS uchun mukofot” deb atagan edi.
Iyul oyida Buyuk Britaniya bosh vaziri Keyr Starmer Isroilga nisbatan bir qator shartlarni bildirgan: G‘azodagi og‘ir vaziyatni to‘xtatish, otashkesimga rozi bo‘lish, ikki davlatli yechim imkoniyatini qayta tiklash, BMTning gumanitar yordam yetkazilishiga ruxsat berish va G‘arbiy sohilda yangi anneksiyalarga yo‘l qo‘ymaslik. BMT Bosh Assambleyasi 9 sentyabrdan Nyu-Yorkda boshlanadi.
Irlandiya, Ispaniya va Norvegiya allaqachon Falastinni davlat sifatida tan olgan. 2024 yil mart holatiga ko‘ra, BMTning 193 a’zosidan 147 tasi Falastinni rasmiy davlat deb e’tirof etgan.
Shu bilan birga, Isroil moliya vaziri Betsalel Smotrich G‘arbiy sohilda yangi turar joy posyolkasi qurish rejasini e’lon qildi va bu qadam Falastin davlatchiligi g‘oyasini butunlay yo‘qqa chiqarishini ta’kidladi. Bundan tashqari, AQSh davlat kotibi Marko Rubio Falastin ma’muriyati va Falastin Ozodlik Tashkilotining 81 vakilining vizasini bekor qildi.
Bu ularning BMT Bosh Assambleyasida ishtirok etish imkoniyatini cheklaydi. Qayd etish lozimki, 1947 yilgi BMT kelishuvida AQSh xorijiy diplomatlarning Nyu-Yorkdagi yig‘ilishlarga kirishini ta’minlashi kerakligi ko‘rsatib o‘tilgan, ammo Vashington xavfsizlik va tashqi siyosat sabablarini asos qilib ko‘rsatib, vizani rad etish huquqiga ega ekanligi ma’lum.
