Belgorod viloyatida yashovchi 42 yoshli ayol sehr-joduga ishonib, firibgarning qurboniga aylangan. Bu haqida Zamin.uz xabar berdi.
U oilasini "laʼnatdan qutqarish" maqsadida to‘rt oy davomida folbinga 4 million rubldan ortiq pul o‘tkazgan. Viloyat Ichki ishlar boshqarmasi bu haqda rasmiy ma’lumot berdi.
Hodisa ayol internetdagi “sehrli xizmatlar” reklamasini ko‘rib qolishi bilan boshlangan. Folbin bilan bog‘lanish uchun u post ostiga “Shunday bo‘lsin” deb yozgan va tez orada javob olgan.
Dastlab, marosim uchun sham sotib olish bahonasida undan 2 ming rubl talab qilingan. Keyinchalik folbin ayolning oilasidagi barcha a’zolar “laʼnatlangan”ligini aytib, uni darhol olib tashlash kerakligini bildirgan.
Shundan so‘ng ayol to‘rt oy davomida muntazam pul yuborib kelgan. To‘plangan summa 4 million rublga yetgan, ammo uning hayotida hech qanday ijobiy o‘zgarish yuz bermagan.
Vaziyat yanada shubhali bo‘lishiga sabab folbin ayoldan “yakuniy marosim” uchun butun kvartirasini sotishni talab qilgani bo‘lgan. Shuningdek, “Gubkinskiy” shahar Ichki ishlar bo‘limi ma’lumotlariga ko‘ra, o‘tgan hafta viloyatda 70 nafar fuqaro masofaviy o‘g‘rilik va telefon firibgarligi qurboni bo‘lgan.
Umumiy zarar 30,4 million rubldan oshgan, shundan qariyb 6 millioni kredit mablag‘lari hisoblanadi. Ichki ishlar organlari fuqarolarni ehtiyot bo‘lishga chaqirmoqda.
