Yevropaning yirik davlatlari rahbarlari Ukraina prezidenti Volodimir Zelenskiy bilan bo‘lib o‘tgan uchrashuvda Rossiyaning yangi harbiy hujum ehtimoli haqida jiddiy xavotir bildirdi. Bu haqida Zamin.uz xabar berdi.
Bloomberg agentligining ma’lumotlariga ko‘ra, o‘tgan hafta Fransiyaning Tulon shahrida bo‘lib o‘tgan Xavfsizlik kengashi yig‘ilishida Germaniya va Fransiya vakillari Donesk viloyatining sharqida, Pokrovsk yaqinida rus qo‘shinlarining to‘planishi masalasini batafsil muhokama qilgan. Zelenskiy ham yaqinda Rossiyaning 100 mingga yaqin harbiy kuchini Pokrovsk atrofidagi front yo‘nalishiga yo‘naltirganini ma’lum qilgan.
Manbalarga ko‘ra, Moskva qo‘shinlari bir yildan ortiq vaqt davomida ushbu hududni qamal qilishga va nazoratni qo‘lga olishga harakat qilmoqda. Pokrovskni egallash Rossiyaga Kramatorsk va Slavyansk kabi yirik markazlarga yo‘l ochishi mumkin, bu esa Kremlning Donesk viloyati ustidan to‘liq hukmronlik o‘rnatish maqsadi bilan bevosita bog‘liqdir, deya ta’kidlanadi.
Maqolada aytilishicha, Rossiyaning yozda amalga oshirgan kuchli hujumlari kutilgan natijalarni bermadi. Moskva qo‘shinlari sekinlik bilan olg‘a siljib, may va avgust oylarida atigi 2033 kvadrat kilometr hududni egallagan, bu esa Ukraina maydonining atigi 0,3 foizini tashkil etadi.
Shu sababli, Yevropa yetakchilari Kiyev bilan xavfsizlik kafolatlari bo‘yicha fikr almashar ekan, frontdagi vaziyat va Rossiyaning ehtimoliy harakatlari ularning asosiy tashvishiga aylangan. Bu masalalar mintaqadagi tinchlik va barqarorlik uchun muhim ahamiyatga ega ekanligi qayd etildi.
