Tesla va SpaceX kompaniyalari rahbari Ilon Mask moliyaviy salohiyatini bir trillion dollardan oshirish imkoniyatiga ega bo‘lishi kutilmoqda. Bu haqida Zamin.uz xabar berdi.
Kompaniya unga tarixdagi eng katta va muhim bitimni taklif qilgan. Hozirda Maskning boyligi taxminan 428 milliard dollarni tashkil qiladi.
Mutaxassislarning hisob-kitoblariga ko‘ra, yangi aksiyalar va maxsus bonuslar tufayli uning moliyaviy aktivlari taxminan 900 milliard dollarga oshishi mumkin. Bu esa uni dunyoda birinchi trillionerga aylantiradi.
Tesla direktorlar kengashi Ilon Maskni kamida 2030-yilgacha bosh direktor lavozimida saqlab qolishni rejalashtirmoqda. Bu vaqt davomida kompaniya bir qator muhim maqsadlarni amalga oshirishni ko‘zda tutmoqda.
Jumladan, 10 yil ichida kompaniya kapital qiymatini 1,1 trillion dollardan 8,5 trillion dollargacha oshirish, 2035-yilgacha 20 million elektromobil ishlab chiqarish, shuningdek, bir milliondan ortiq robotaksi va Optimus robotlarini yaratish rejalashtirilgan. Directorlar kengashi raisi Robin Denholm Ilon Maskni ushlab turish va rag‘batlantirish Tesla uchun strategik jihatdan muhim ekanligini ta’kidladi.
Noyabr oyida aksiyadorlar ushbu kelishuv bo‘yicha ovoz berishadi. Hozirda ba’zi investorlar bitim amalga oshmasligi va kompaniyaning kelajagiga ta’siri haqida munozaralar olib bormoqda.
