Yaponiya bosh vaziri Sigeru Isiba iste’foga chiqdi
Yaponiya siyosatida kutilmagan voqea yuz berdi. Bu haqida Zamin.uz xabar berdi.
Mamlakat bosh vaziri Sigeru Isiba o‘z lavozimidan iste’fo berishini rasman e’lon qildi. Bu qaror Liberal-demokratik partiyaning yaqinda o‘tgan parlament saylovlarida mag‘lubiyatga uchragani ortidan qabul qilindi.
Mutaxassislarning ta’kidlashicha, Isiba partiya ichida bo‘linishlarga yo‘l qo‘ymaslik maqsadida bunday qadam tashladi. Yakshanba kuni o‘tkazilgan matbuot anjumanida bosh vazir AQSH prezidenti Donald Tramp ma’muriyati bilan tuzilgan savdo kelishuvi muvaffaqiyatli yakunlangani sababli iste’foga chiqishga qaror qilganini bildirdi.
Yozda Tramp Tokiodan 1-avgustgacha savdo bitimini imzolashni talab qilgan, aks holda yapon eksportiga 25 foizlik bojlar joriy etilishi bilan tahdid qilgan edi. Isiba jurnalistlarga shunday dedi: “Men har doim lavozimga mahkam yopishib olmaslik va kerakli paytda qaror qabul qilishni aytganman.
Amerika bilan muzokaralar muvaffaqiyat bilan yakunlangandan so‘ng, iste’foga chiqish va yangi avlodga yo‘l berish vaqti keldi, deb hisoblayman.” 2024-yil oktyabrida bosh vazir bo‘lgan Isiba avvalgi rahbar Fumio Kisida o‘z nomzodini qo‘ymay qo‘yganidan keyin partiya ichidagi saylovlarda g‘alaba qozongan edi. U inflyatsiyaga qarshi choralar ko‘rish, iqtisodiy barqarorlikni ta’minlash va partiya ichidagi islohotlarni amalga oshirishni va’da qilgan.
Ammo qisqa muddat ichida mablag‘ yig‘ish bilan bog‘liq mojaro yuzaga keldi. Iyul oyidagi saylovlarda Liberal-demokratik partiya va uning koalitsiyasi yuqori palatada ko‘pchilik o‘rnini yo‘qotdi.
Bu partiyaning 70 yillik tarixida ilk bor yuz bergan holatdir. Saylov natijasiga ko‘ra, hukmron blok 248 o‘rindan atigi 47 mandatga ega bo‘ldi.
NHK va Asahi Shimbun manbalariga ko‘ra, ko‘plab yapon siyosatchilari Isibani lavozimidan ketishga chaqirgandi. Biroq u o‘tgan haftagacha iste’foga chiqish niyatida emasligini bildirgan edi.
Liberal-demokratik partiya 1955-yildan beri deyarli uzluksiz hokimiyatda bo‘lib, o‘ng markaziy siyosiy kuch sifatida faoliyat yuritib kelmoqda. Isibaning iste’fosi partiya va hukumat uchun yangi davrni boshlab beradi va mamlakat siyosiy hayotida katta o‘zgarishlarga sabab bo‘lishi kutilmoqda.
