AQSH va Yevropa Rossiyaga yangi sanksiyalar tayyorlamoqda

AQSH Rossiyani muzokaralar stoliga jalb etish maqsadida Yevropa bilan hamkorlikda yangi iqtisodiy sanksiyalarni joriy etishni rejalashtirmoqda. Bu haqida Zamin.uz xabar berdi.

Bu haqda AQSH moliya vaziri Skott Bessent NBC telekanaliga bergan intervyusida ma’lum qildi. Uning so‘zlariga ko‘ra, AQSH va Yevropa Ittifoqining birgalikdagi iqtisodiy bosimi Moskva uchun jiddiy muammolarni keltirib chiqarishi va uni muzokaralar jarayoniga kirishga majbur qilishi mumkin.

Bessent Yevropani sanksiyalar masalasida Vashington tajribasidan o‘rganishga chaqirdi, chunki ikki tomonlama bosim yanada samarali natija berishi ehtimoli yuqori. Avvalroq AQSH Rossiya neftini xarid qilgani uchun Hindistonga qo‘shimcha bojlar joriy qilgan edi.

Bild va Reuters agentliklarining xabarlariga ko‘ra, 4-sentyabr kuni AQSH prezidenti Donald Tramp Yevropa yetakchilari bilan uchrashuvda ulardan Rossiya neftini xarid qilishni to‘xtatishni qat’iy talab qilgan. Ushbu choralar Rossiya iqtisodiyotiga qo‘shimcha bosim sifatida baholanmoqda.

Shu bilan birga, yangi sanksiyalar orqali G‘arb Moskvadan siyosiy pozitsiyasini o‘zgartirishni kutmoqda.