Xitoy yosh mutaxassislar uchun yangi «K» vizasini joriy etdi
1-oktyabrdan boshlab Xitoyda ilm-fan va texnologiya sohasida faoliyat yuritayotgan yosh xorijiy mutaxassislar uchun maxsus «K» toifasidagi yangi viza joriy etiladi. Bu haqda Zamin.uz xabar berdi.
Ushbu qaror avgust oyida Xitoy Davlat kengashi tomonidan qabul qilinganligi ma’lum qilindi. Yangi tizimning asosiy maqsadi xalqaro aloqalarni mustahkamlash, ilmiy va tadqiqot hamkorligini kengaytirish hamda yosh mutaxassislar uchun keng imkoniyatlar yaratishdir.
«K» vizasi egalariga avvalgi 12 turdagi vizalarga nisbatan ko‘proq imtiyozlar beriladi. Jumladan, mamlakatga kirish sonining cheklanmasligi, viza amal qilish muddatining uzaytirilishi hamda uzoqroq vaqt davomida qolish huquqi ta’minlanadi.
«K» vizasi egalari ta’lim dasturlari, madaniy tadbirlar va ilmiy-texnik almashinuv loyihalarida ishtirok etishlari mumkin. Shuningdek, ular Xitoy hududida tadbirkorlik, ishbilarmonlik yoki startap loyihalarini amalga oshirish imkoniyatiga ham ega bo‘ladi.
Muhim yangiliklardan biri shundaki, ariza topshirish jarayonida xitoylik ish beruvchi yoki tashkilotdan taklifnoma talab qilinmaydi. Bu yosh mutaxassislar uchun hujjat topshirish jarayonini sezilarli darajada yengillashtiradi va ortiqcha to‘siqlarni bartaraf etadi.
Migratsiya sohasidagi mutaxassislarning fikricha, yangi viza toifasining joriy etilishi Xitoyning xalqaro maydondagi nufuzini oshiradi. Shu bilan birga, mamlakat yuqori texnologiyalar sohasida dunyo bo‘ylab iqtidorli mutaxassislarni jalb qilish markaziga aylanishi mumkin.
Qayd etish joizki, ushbu qaror AQSHda xorijiy mutaxassislarga beriladigan H-1B viza dasturidagi o‘zgarishlardan keyin amalga oshirilmoqda. Donald Trampning farmoniga ko‘ra, endi kompaniyalar har bir nomzod uchun 100 ming dollarlik yillik to‘lovni amalga oshirishlari shart.
Bu esa xorijiy mutaxassislar uchun yangi imkoniyatlar izlashga turtki bo‘lmoqda.
