Yurak kasalliklari dunyoda o‘lim sababchisi
Olimlarning so‘nggi tadqiqotlari yurak va qon tomir kasalliklari dunyoda eng ko‘p uchraydigan va inson o‘limiga sabab bo‘luvchi asosiy omil ekanligini ko‘rsatmoqda. Bu haqda Zamin.uz xabar berdi.
1990 yildan 2023 yilgacha bo‘lgan davrda 204 mamlakatdan olingan statistik ma’lumotlar shuni bildiradiki, har uchinchi o‘lim aynan bu kasalliklar sabab yuzaga kelgan. 1990 yilda yurak-qon tomir kasalliklari tufayli 13,1 million kishi vafot etgan bo‘lsa, 2023 yilda bu raqam 19,2 millionga yetdi.
Ko‘p mintaqalarda erkaklar orasida o‘lim holatlari ayollarga nisbatan ko‘proq bo‘lib, bu sohada erkaklarning sog‘lig‘iga ta’sir qiluvchi xavf omillarining yuqoriligi haqida dalolat beradi. Yurak va qon tomir kasalliklari sog‘lom hayot yillarining yo‘qotilishida ham birinchi o‘rinni egallaydi.
Mutaxassislar ta’kidlaydiki, yurak-qon tomir kasalliklarining yuzaga kelishida xavf omillarining 80 foizini oldini olish mumkin. Ushbu xavf omillar orasida semizlik, yuqori qon bosimi, qandli diabet va xolesterinning yuqori darajasi muhim o‘rin tutadi.
Shu sababli, aholini sog‘lom turmush tarziga o‘rgatish, to‘g‘ri ovqatlanishni ta’minlash, muntazam jismoniy faollik bilan shug‘ullanish hamda shifokor ko‘rsatmalariga qat’iy rioya qilish zarur. Bu chora-tadbirlar yurak va qon tomir kasalliklarining oldini olishda muhim ahamiyatga ega bo‘lib, insonlarning umrini uzaytirishga xizmat qiladi.
