Shandunda quyosh energiyasi ishlab chiqarish keskin oshdi
Xitoyning Shandun viloyatida elektr energiyasi ishlab chiqarish hajmi kutilmagan darajada oshib, bu hududda elektr narxlari pasayishiga olib keldi. Bu haqda Zamin.uz xabar berdi.
Bloomberg nashrining ma’lumotiga ko‘ra, quyosh panellari orqali ishlab chiqarilayotgan elektr energiyasi me’yordan ancha ko‘p bo‘lib, bu holat tarmoqlarda ortiqcha yuklama yuzaga keltirmoqda. 2020 yildan 2025 yilgacha Shandunda quyosh elektr stansiyalarining umumiy quvvati 23 gigavattdan 85 gigavattgacha oshdi.
Bu esa uy tomlariga keng ko‘lamda quyosh panellari o‘rnatilishi natijasida amalga oshirildi. Agar Shandun alohida davlat bo‘lganida, u elektr energiyasi ishlab chiqarish bo‘yicha dunyoda oltinchi o‘rinni egallagan bo‘lardi.
Quyosh energiyasining asosiy kamchiligi shundaki, u asosan kunning o‘rtalarida, ya’ni talab kam bo‘lgan paytda ko‘proq ishlab chiqariladi. Bu esa tarmoqdagi yuklamaning nomutanosibligiga sabab bo‘ladi.
Shu sababli viloyat rahbarlari energiya balansini muvozanatlash uchun shamol va atom energetikasini rivojlantirishni tezlashtirishni rejalashtirmoqda. Bundan tashqari, kunduzgi iste’molni rag‘batlantirish maqsadida tariflarni pasaytirish mumkin.
Ortiqcha energiyani saqlash va kechqurun taqsimlash uchun akkumulyator tizimlari ham keng joriy etilmoqda. Bu chora-tadbirlar elektr tarmoqlarining barqaror ishlashini ta’minlashga qaratilgan.
