Visualcapitalist portalining mutaxassislari Birlashgan Millatlar Tashkilotining rasmiy ma’lumotlariga asoslanib, mamlakatlarning o‘rtacha umr ko‘rish ko‘rsatkichlari bo‘yicha yangi infografika tayyorladi. Bu haqda Zamin.uz xabar berdi.
Ushbu tahlil natijalari dunyoning turli mintaqalarida inson umrining qanchalik farq qilishini aniq ko‘rsatdi. BMT statistikasiga ko‘ra, dunyoda eng uzoq umr ko‘rish ko‘rsatkichi Monakoda qayd etilgan bo‘lib, bu mamlakatda odamlar o‘rtacha 86,5 yil yashaydi.
Shuningdek, ro‘yxatning yuqori qismida San-Marino (85,8 yil) va Gonkong (85,6 yil) ham bor. Bu davlatlarda tibbiyot xizmatining yuqori darajasi, sog‘lom turmush tarzi va iqtisodiy barqarorlik uzoq umr ko‘rishda asosiy omillar sifatida ta’kidlanmoqda.
Aksincha, ro‘yxatning pastki qismida Afrika davlatlarida aholi umrining qisqa ekanligi ko‘zga tashlanadi. Masalan, Nigeriyada o‘rtacha umr 54,6 yilni tashkil etadi.
Chadda bu ko‘rsatkich 55,2 yil, Markaziy Afrika Respublikasida esa 57,7 yilni tashkil qilmoqda. Mutaxassislar bunday past ko‘rsatkichlarning asosiy sabablarini qashshoqlik, tibbiy xizmatning yetishmasligi va siyosiy beqarorlik bilan izohlamoqda.
Rossiya 73,3 yillik o‘rtacha umr bilan jahon reytingida 102-o‘rinni egallagan. Bu ko‘rsatkich AQSh (79,5 yil) va Xitoy (78 yil)dan pastdir.
Ekspertlarning fikricha, Rossiyada umr ko‘rishning past bo‘lishiga sog‘liqni saqlash tizimidagi muammolar va aholining turmush tarzi ta’sir qilmoqda. Shu bilan yakuniy xulosa shuki, dunyoda inson umr ko‘rish darajasi mintaqalar kesimida sezilarli farq qiladi.
Rivojlangan davlatlarda bu ko‘rsatkich yuqori bo‘lsa, ayrim rivojlanayotgan mamlakatlarda aholi umrining qisqarishi kuzatilmoqda. Bu holat ijtimoiy va iqtisodiy omillar bilan chambarchas bog‘liqdir.
