O‘zbekiston harbiylari Koreyada xalqaro musobaqada g‘olib bo‘ldi
Janubiy Koreyaning Kongvando provinsiyasi, Inje shahrida 21–26 sentyabr kunlari o‘tkazilgan xalqaro musobaqada O‘zbekiston harbiylari barcha raqiblardan ustun chiqib, munosib g‘alabaga erishdi. Bu haqda Zamin.uz xabar berdi.
Bu haqda Mudofaa vazirligi rasmiy ma’lumot berdi. Musobaqa Quruqlik qo‘shinlari Ilmiylashtirilgan mashg‘ulot markazida tashkil etilgan uchinchi xalqaro ilmiy-jangovar tayyorgarlik musobaqasi bo‘lib, unda Koreya, AQSH, Yangi Zelandiya, Kambodja, NATO qo‘shma guruhi va yana 16 ta jamoa hamda 500 ga yaqin harbiy xizmatchi qatnashdi.
Bellashuv dasturi juda serqirra bo‘lib, ishtirokchilar operativ reja tuzish, milliy kelishuv bo‘yicha majburiyatlarni bajarish hamda bo‘linmalarning qo‘shma operatsiyalarida kerakli ko‘nikmalarni mustahkamlashga qaratildi. Qur’a tashlash orqali asosiy bosqichlar boshlandi.
Musobaqa qoidalariga ko‘ra, harbiylar tog‘oldi, o‘rmon va shahar sharoitida o‘tkazilgan 12 bosqichli shartli jangovar simulyatsiyalarda ishtirok etdi. Har bosqichda taktik harakatlar, jangovar qoidalarga rioya qilish, shartli dushmanni yo‘qotish va omon qolish darajasi batafsil tahlil qilindi.
O‘zbekiston harbiylari o‘z mahorati va tezkorligi bilan ajralib chiqdi. Ular shartli dushmanning asosiy qo‘mondonlik punktini atigi 21 daqiqada egalladi, bu esa oldingi rekord 33 daqiqadan ancha yaxshi natija bo‘ldi.
Mudofaa jarayonida dushman kuchlarini yo‘qotish uchun 25 daqiqa yetarli bo‘ldi, bu ko‘rsatkich ham ilgari qayd etilgan eng yaxshi natijadan ancha yuqori bo‘ldi. Ekspertlar fikricha, o‘zbek harbiylarining bunday muvaffaqiyati yuksak tayyorgarlik va intizom natijasi bo‘lib, ular jahon miqyosida raqobatbardosh kuch sifatida shakllanayotganini ko‘rsatadi.
Shu tariqa, Koreyadagi musobaqa nafaqat O‘zbekiston armiyasining sharafini oshirdi, balki milliy harbiy maktabning zamonaviy yo‘nalishlarda qanchalik kuchli rivojlanayotganini ham namoyish etdi.
