Hindistonning Tamilnadu shtatida 27 sentyabr kuni kechqurun siyosiy mitingda yuzaga kelgan tiqilinchda kamida 39 kishi halok bo‘ldi, 50 dan ortiq inson turli tan jarohatlari oldi. Bu haqda Zamin.uz xabar berdi.
Miting taniqli aktyor Vijayning partiyasi tarafdorlari ishtirokida o‘tkazilgan edi. Guvohlarning so‘zlariga ko‘ra, tiqilinch sahna tomon harakat boshlanganda yuzaga kelgan.
Odamlar sarosimaga tushib, ko‘plari hushini yo‘qotgan, ayrimlari esa oyoq osti qilingan. Qurbonlarning katta qismi ayollar va bolalar bo‘lib, ularning oilalariga hukumat tomonidan bir million rupiy miqdorida kompensatsiya berilishi rejalashtirilmoqda.
Shuningdek, voqea yuzasidan chuqur tekshiruv o‘tkazilishi haqida ham va’da berildi. Hindiston bosh vaziri Narendra Modi ushbu hodisani o‘ta qayg‘uli baxtsiz voqea deb atadi va jarohatlanganlarga tezroq sog‘ayishni tiladi.
Mamlakatda shunga o‘xshash tiqilinch holatlari yil davomida ko‘p marotaba sodir bo‘lib, ko‘plab odamlarning hayotiga zomin bo‘lmoqda. Bu voqea mamlakatning ommaviy tadbirlarda xavfsizlik choralari kuchaytirilishi zarurligini yana bir bor ko‘rsatdi.
