YouTube Tramp bilan sudni 24,5 millionga hal qildi
CNN xabariga ko‘ra, YouTube AQSH sobiq prezidenti Donald Tramp bilan bo‘lgan sud da’vosini katta miqdordagi to‘lov orqali hal qilishga kelishib oldi. Bu haqda Zamin.uz xabar berdi.
Tramp 2021-yil 6-yanvarda yuz bergan voqealardan keyin bir qator ijtimoiy tarmoqlarda, jumladan YouTube platformasida ham bloklangan edi. Ma’lumotlarga ko‘ra, YouTube Tramp tomonidan qo‘llab-quvvatlanadigan Trust for the National Mall nodavlat tashkilotiga 22 million dollar ajratadi.
Ushbu tashkilot Vashingtondagi National Mall maydonini tiklash va Oq Uy hududida maxsus zal qurilishini moliyaviy qo‘llab-quvvatlaydi. Bundan tashqari, YouTube yana 2,5 million dollarni boshqa da’vogarlarga, jumladan American Conservative Union tashkilotiga ham to‘laydi.
Eslatib o‘tamiz, YouTube Tramp tomonidan sudga berilgan uchta yirik ijtimoiy tarmoqdan oxirgisi bo‘ldi. Avvalroq Meta korporatsiyasi yanvar oyida 25 million dollar to‘lab, nizoni hal qilgan, Twitter esa fevral oyida 10 million dollarlik kelishuvga erishgan edi.
Ijtimoiy tarmoqlar Trampning ayrim postlari zo‘ravonlikka chaqirishi mumkinligini bildirgan holda uning akkauntlarini bloklagan bo‘lsalar-da, hozirda texnologik kompaniyalar unga va uning tarafdorlariga nisbatan nisbatan iliqroq munosabatda bo‘lmoqda. Xususan, Elon Mask Twitter’ni sotib olgach, Tramp hisobini tikladi.
Keyinchalik Meta va YouTube ham shunday qaror qabul qildi. Yaqinda YouTube noto‘g‘ri ma’lumot tarqatgani uchun bloklangan ayrim akkauntlarni qayta faollashtirishini e’lon qilib, konservativ fikrlarga hurmat bilan munosabatda bo‘lishini ta’kidladi.
Bu o‘zgarishlar ijtimoiy tarmoqlarda siyosiy munosabatlarning yumshashiga olib kelmoqda.
