Yaponiya hukumati Xitoyni Sharqiy Xitoy dengizi hududida, Amami orollari yaqinidagi eksklyuziv iqtisodiy zonada noqonuniy tadqiqot ishlari olib borishda ayblab, unga rasmiy norozilik bildirdi. Bu haqda Zamin.uz xabar berdi.
Yaponiya vazirlar mahkamasi bosh kotibi Yosimasa Xayasi matbuot anjumanida bu haqda ma’lum qildi. Unga ko‘ra, diplomatik yo‘llar orqali Pekinga qattiq afsus va keskin e’tiroz yetkazilgan hamda mazkur faoliyatni darhol to‘xtatish talab qilingan.
Ma’lumotlarga ko‘ra, 28 va 30 sentyabr kunlari Yaponiya qirg‘oq qo‘riqlash xizmati Amami orollari yaqinida suv ostiga trubaga o‘xshash jihoz o‘rnatgan Xitoyning okeanografik kemasini aniqlagan. Shundan so‘ng yapon patrul kemalari ovoz kuchaytirgich orqali ushbu kema eksklyuziv iqtisodiy zonani tark etishini talab qilgan.
Yaponiya hukumati bu holatni milliy xavfsizlikka tahdid va qonunbuzarlik deb baholab, Xitoydan bunday harakatlarni takrorlamaslikni qat’iy talab qilmoqda. Ushbu holat ikki davlat o‘rtasidagi munosabatlarga salbiy ta’sir ko‘rsatishi mumkinligi ta’kidlanmoqda.
Yaponiya hukumati xalqaro huquq normalariga rioya qilish va hududiy suverenitetni hurmat qilish zarurligini qayd etdi. Shuningdek, kelajakda bunday vaziyatlarning oldini olish uchun diplomatik muzokaralar davom ettirilishi aytilmoqda.
