Tramp Venesuelada maxfiy operatsiyalarni boshladi
AQSh prezidenti Donald Tramp Markaziy razvedka boshqarmasiga Venesuela hududida maxfiy operatsiyalar o‘tkazish uchun rasmiy ruxsat berganini ma’lum qildi. Bu haqda Zamin.uz xabar berdi.
Bu haqda u Oq uyda jurnalistlar bilan suhbatda so‘zlab berdi. Qaror AQSh harbiy kuchlari Karib dengizi akvatoriyasida narkotik modda tashishda gumon qilingan kemalarga zarba berganidan keyin qabul qilingan.
Sentabrdan buyon kamida beshta qayiq yo‘q qilingan va 27 kishi halok bo‘lgan. Ularning to‘rttasi Venesueladan chiqqanligi aytilmoqda.
Trampning ta’kidlashicha, bu qadam ikki asosiy sababga ko‘ra qabul qilingan. Birinchidan, Venesuela narkotiklarni AQShga katta miqdorda olib kirmoqda, ikkinchidan esa Venesueladan AQShga mahbuslar yuborilmoqda.
Prezident ma’muriyat quruqlikda ham zarbalarni ko‘rib chiqayotganini bildirdi, bu esa Vashingtonning Venesuelaga nisbatan siyosatini yanada keskinlashtirishini anglatadi. Shu kuni Venesuela prezidenti Nikolas Maduro milliy televideniyada chiqish qilib, MRB faoliyatini qoraladi va tinchlikka chaqirdi.
U MRBning “rejim almashtirish” amaliyotlarini Afg‘oniston, Iroq va Liviyadagi voqealar bilan solishtirib, bunday to‘ntarishlarga qarshi ekanligini bildirdi. Maduro 1973 yildagi Chili to‘ntarishini ham eslatib, Lotin Amerikasi yangi ziddiyatlarni xohlamasligini ta’kidladi.
Venesuela Tashqi ishlar vazirligi Trampning so‘zlarini “urushga chaqiruvchi va xavfli” deb baholadi. Vazir Ivan Gil bayonotida bu fikr xalqaro huquq va BMT Nizomiga zid ekanligi, jahon hamjamiyati tomonidan qoralanishi lozimligi aytildi.
AQSh Kongressining ikki partiya vakillari ham Tramp ma’muriyatining Venesuela narkokartellariga qarshi harbiy harakatlarini tanqid qildi va prezidentni Kongress roziligisiz urush boshlashda aybladi. Tahlilchilarning fikricha, Tramp ma’muriyati Venesuelaga bosimni kuchaytirish orqali Lotin Amerikasida o‘z nufuzini oshirishga intilmoqda.
Ammo hozircha hujum qilingan kemalar haqiqatdan narkotik tashiganiga oid aniq dalillar mavjud emas. Shu sababli, Vashington va Karakas o‘rtasidagi ziddiyat yangi bosqichga ko‘tarilib, siyosiy tortishuv ochiq harbiy to‘qnashuvga aylanish xavfi yuzaga kelmoqda.
