Toshkent hokimligi kuchli shamol sababli aholini ogohlantirdi
Toshkent shahar hokimligi poytaxt hududida kuzatilayotgan noqulay ob-havo sharoiti munosabati bilan aholi va shahar mehmonlarini ehtiyot choralarini ko‘rishga chaqirdi. Bu haqda Zamin.uz xabar berdi.
Mutaxassislarning ma’lumotlariga ko‘ra, shamol tezligining keskin kuchayishi bir qator xavfli vaziyatlarni yuzaga keltirishi mumkin. Shu sababli, fuqarolardan ko‘chada harakatlanayotganda o‘ta hushyor bo‘lish talab etiladi.
Kuchli shamol oqibatida elektr uzatish tarmoqlarida uzilishlar sodir bo‘lishi va ayrim hududlarda energiya ta’minotida vaqtinchalik muammolar kelib chiqishi ehtimoli mavjud. Shu bilan birga, yirik daraxtlar yoki ularning shoxlari sinib tushishi holatlari ham kuzatilishi mumkin.
Bunday vaziyatlar nafaqat yo‘llardagi transport vositalariga zarar yetkazishi, balki piyodalarning sog‘lig‘i va hayoti uchun ham jiddiy xavf tug‘diradi. Mutaxassislar ushbu noqulay ob-havo sharoitida xavfsizlik qoidalariga qat’iy rioya qilishni tavsiya etmoqda.
Avtomobil egalariga o‘z transport vositalarini daraxtlar, reklama ustunlari, qurilishi tugallanmagan binolar hamda elektr liniyalari yaqinida qoldirmaslik maslahat beriladi. Piyodalar esa harakatlanish davomida atrofdagi ob’ektlarga e’tiborli bo‘lishlari, imkon qadar ochiq maydonlarda uzoq vaqt qolmasliklari lozim.
Agarda biror-bir favqulodda holat yuzaga kelsa yoki yordamga ehtiyoj tug‘ilsa, fuqarolar zudlik bilan tegishli xizmatlarning 112 va 1055 qisqa raqamlariga bog‘lanishlari mumkin. Hozirgi vaqtda shahar kommunal xo‘jaligi va tezkor qutqaruv xizmatlari kuchaytirilgan ish tartibiga o‘tkazilgan.
Barcha soha mutaxassislari yuzaga kelishi mumkin bo‘lgan talafotlarning oldini olish va mavjud muammolarni bartaraf etish uchun to‘liq shay holatga keltirilgan. Vaziyat mutasaddi idoralar tomonidan doimiy nazorat qilib borilmoqda.
