Pikassoning noyob asari Granadaga yetib bormadi
Ispaniyada Pablo Pikassoning “Gitarali natyurmort” nomli noyob asari yo‘qolib qoldi. Bu haqda Zamin.uz xabar berdi.
Ushbu asar 1921-yilda go‘ash texnikasida yaratilgan bo‘lib, o‘lchami atigi 12,7 x 9,8 santimetrni tashkil etadi. Asar Madriddan Granadaga ko‘rgazmaga yuborilayotgan paytda izsiz yo‘qoldi.
U “Nature morte. La eternidad de lo inerte” — “Natyurmort.
Harakatsizlikning abadiyligi” nomli ko‘rgazmada namoyish etilishi rejalashtirilgan edi, ammo manzilga yetib bormadi. Ispaniya Milliy politsiyasining tarixiy meros bo‘yicha maxsus bo‘limi 10-oktyabrda ushbu holat yuzasidan tergov ishlarini boshladi.
Ma’lumotlarga ko‘ra, “Gitarali natyurmort” xususiy to‘plamga tegishli bo‘lib, san’at asarlarini tashishga ixtisoslashgan kompaniya orqali Madriddagi Pio XII prospektidagi uydan 25-sentyabr kuni olib chiqilgan. Barcha asarlar bir vaqtda omborga joylashtirilib, Granadaga jo‘natilgan.
Tashuvchi furgon 3-oktyabr kuni Granadaga yetib kelgan, ammo tekshiruv jarayonida Pikassoning asari yo‘qligi ma’lum bo‘lgan. Yo‘l davomida Deyfontes shahrida to‘xtab dam olishlari aniqlangan va bu hozirgi tergovning asosiy jihatlaridan biridir.
Fond videokuzatuv yozuvlarini tahlil qilgan bo‘lsa-da, dam olish kunlari olingan tasvirlarda hech qanday shubhali holat qayd etilmadi. Biroq, asarning qadoqlari noto‘g‘ri raqamlanganligi sababli aniq tekshiruv kechikdi.
Ko‘rgazma rahbari va menejerlari barcha hujjatlarni oldindan imzolagan bo‘lsa-da, 6-oktyabr kuni asarlar joylashtirilayotganda Pikassoning asari yo‘qligi kurator Mariya Toral tomonidan aniqlangan. Hozirga qadar hech kim hibsga olinmadi, asar esa topilmadi.
Politsiyaning bir versiyasiga ko‘ra, asar logistika jarayonida adashib ketgan bo‘lishi mumkin, boshqasiga ko‘ra esa u oldindan rejalashtirilgan o‘g‘irlik natijasi hisoblanadi. Granadadagi ko‘rgazmada Pikassodan tashqari Xuan Gris, Rene Magritt va Rafael Sabaleta kabi mashhur rassomlarning jami 58 ta asari namoyish etilmoqda.
Ko‘rgazma 2026-yil 11-yanvargacha davom etadi. Eslatib o‘tish joizki, ilgari Pikassoning “Gulli qalpoqli ayol byusti” nomli asari 80 yil davomida ommaga ko‘rsatilmagan holda kimoshdi savdosiga qo‘yilgani haqida ham xabar berilgan edi.
