Shimoliy Kipr Turk Respublikasida bo‘lib o‘tgan prezidentlik saylovlarida muxolifatdagi Turkiya Jumhuriyat partiyasi rahbari Tufan Erhyurman g‘alaba qozondi. Bu haqda Zamin.uz xabar berdi.
Dastlabki ma’lumotlarga ko‘ra, u saylovda ovoz beruvchilarning taxminan 63 foizini qo‘lga kiritdi. Uning asosiy raqibi, amaldagi prezident Ersin Tatar esa 36 foiz atrofida ovoz olgan.
Ersin Tatar Turkiya hukumatining qo‘lloviga ega bo‘lib, orolning bo‘linib qolishini qo‘llab-quvvatlovchi siyosatchi sifatida tanilgan. Erhyurman o‘z g‘alabasini Kipr turk xalqining umumiy yutug‘i deb baholadi.
U Turkiya bilan do‘stona munosabatlar saqlanib qolishini ta’kidladi va orolning ikki qismi o‘rtasidagi muzokaralarni qayta boshlash niyatida ekanini bildirdi. Uning siyosiy yo‘nalishi federativ Kipr g‘oyasini qo‘llab-quvvatlashga qaratilgan bo‘lib, bu Turkiyaning hozirgi siyosatidan farq qiladi.
Shimoliy Kipr iqtisodiy va harbiy jihatdan Turkiyaga bog‘liq bo‘lib kelgan. Erhyurman rahbarligidagi jamoa islohotlar o‘tkazish, fuqarolik jamiyati faolligini oshirish, lavozimlarga tayinlovlarda shaffoflikni ta’minlash hamda Yevropa Ittifoqi bilan aloqalarni kuchaytirishni rejalashtirmoqda.
Mutaxassislar fikricha, ushbu saylov natijalari nafaqat Shimoliy Kiprning ichki siyosatiga, balki Anqara va Nikosiya o‘rtasidagi munosabatlarga ham ta’sir ko‘rsatishi mumkin. Shimoliy Kipr Turk Respublikasi xalqaro miqyosda tan olinmagan davlat hisoblanadi.
U Kipr orolining shimoliy uchdan bir qismini egallaydi va faqat Turkiya tomonidan rasmiy tan olingan. Respublikada taxminan 300 ming aholi yashaydi.
Turkiya bu hududda harbiy kontingent saqlaydi, Kipr Respublikasi va BMT esa bu holatni okkupatsiya deb hisoblaydi. SHKTR ayni paytda Islom hamkorlik tashkiloti va Turkiy davlatlar tashkilotida kuzatuvchi maqomiga ega.
Tufan Erhyurman g‘alabasi Kipr orolida siyosiy muhokamalarning yangi bosqichga o‘tish ehtimolini oshirdi.
