Bolgariya Putin va Tramp uchrashuvini qo‘llab-quvvatlaydi
Bolgariya hukumati Rossiya prezidenti Vladimir Putin va AQSh prezidenti Donald Tramp o‘rtasida Budapeshtda uchrashuv o‘tkazish imkoniyatiga munosabat bildirdi. Bu haqda Zamin.uz xabar berdi.
Mamlakat tashqi ishlar vaziri Georg Georgiyevning so‘zlariga ko‘ra, Sofiya tinchlik muzokaralariga xizmat qiladigan har qanday tashabbusni qo‘llab-quvvatlashga tayyor. U Bolgariya milliy radiosiga bergan intervyusida tinchlikka erishish uchun zarur bo‘lgan har qanday uchrashuvni tashkil etish eng to‘g‘ri yo‘l ekanini ta’kidladi.
Vazir jurnalist savoliga javoban uchrashuvda ishtirokchilar kelmasa, uning ma’nosi yo‘q ekanini aytdi. Shu bilan birga, u tinchlik muzokaralariga xizmat qiladigan har qanday harakatni qo‘llab-quvvatlashni ta’kidladi.
Eslatib o‘tamiz, 16-oktyabr kuni Donald Tramp Rossiya prezidenti bilan ikki soatlik telefon muloqoti o‘tkazgan. Suhbattan so‘ng Tramp Budapeshtda yuzma-yuz uchrashuv o‘tkazish niyatini ma’lum qilgan.
Boshqa tomondan, Yevropa Ittifoqining tashqi siyosat va xavfsizlik bo‘yicha oliy vakili Kaya Kallas bu uchrashuv ehtimolini “yoqimsiz signal” deb baholadi. Uning fikricha, xalqaro jinoiy sud tomonidan qidirilayotgan shaxsning Yevropa hududiga kelishi noqulay holatdir.
Shu bilan birga, Kallas agar uchrashuv tinchlik muzokaralariga yordam bersa, uning siyosiy ahamiyati borligini tan oldi. Bolgariyaning ushbu bayonoti Yevropa siyosiy maydonida katta e’tibor qozondi.
Ayrim tahlilchilar Sofiyaning munosabatini pragmatik va diplomatik yondashuv deb atamoqda. Unga ko‘ra, Bolgariya Moskva bilan munosabatlarni yomonlashtirmasdan, Yevropa Ittifoqi siyosati bilan ham ziddiyatga kirishmaslikni maqsad qilgan.
Hozircha Putin va Tramp o‘rtasidagi Budapesht sammitining aniq sanasi ma’lum emas, ammo diplomatik manbalarga ko‘ra, uchrashuv yaqin haftalarda bo‘lib o‘tishi mumkin.
