Islandiyada ilk bor chivin tabiiy muhitda topildi

Islandiyada ilk bor chivin aniqlangani olimlar orasida katta qiziqish uyg‘otdi. Bu haqda Zamin.uz xabar berdi.

Bu voqea mamlakat tarixida chivinlarning tabiiy muhitda yashashi bo‘yicha birinchi rasmiy holat sifatida qayd etildi. 16 oktyabr kuni tabiatshunos Byorn Xyaltason poytaxt Reykyavikdan 20 mil shimolda joylashgan Kjos shahrida uchta chivin topdi.

So‘ngra u Islandiya Tabiatshunoslik instituti entomologi Matias Alfredsson bilan bog‘landi. Ular ikki urg‘ochi va bitta erkak chivinni ushlashga muvaffaq bo‘ldi.

Mutaxassislarning ta’kidlashicha, bu chivinlar sovuq iqlimga moslashgan bo‘lib, yopiq binolarda qishlashga qodir. Ular uzoq va qattiq sovuqqa bardosh berishi mumkin.

Alfredssonning aytishicha, bundan oldin Islandiyada faqat Keflavik xalqaro aeroportida samolyot orqali kelgan boshqa turdagi chivin aniqlangan edi. Ammo bu safar chivinlarning tabiiy muhitda mustaqil yashay boshlagani kuzatilmoqda.

Olimlar chivinlarning mamlakatga qanday kirib kelgani haqida aniq ma’lumotga ega emas. Biroq ular nasima yoki dengiz orqali kelgan yuk kemalari va konteynerlar ta’siri mumkinligini taxmin qilmoqda.

Matias Alfredsson iqlim o‘zgarishlari bu jarayonga ta’sir qilgan bo‘lishi ehtimolini ham istisno etmadi. Uning fikricha, haroratning ko‘tarilishi Islandiyada boshqa chivin turlarining ko‘payishiga sabab bo‘lishi mumkin.

Mutaxassislar bu hodisani Islandiyaning ekotizimi uchun yangi va muhim ilmiy kuzatuv nuqtasi deb baholamoqda. Ushbu kashfiyot mamlakatda biologik xilma-xillik va iqlim o‘zgarishining ta’sirlarini o‘rganishda yangi imkoniyatlar yaratadi.