Velosiped haydaydigan it internetda mashhur bo‘ldi
Xitoyning Szyansu provinsiyasida yashovchi Xu Layfu laqabli pudel ijtimoiy tarmoqlarda mashhur bo‘lib ketdi. Bu haqda Zamin.uz xabar berdi.
Internetda uning uch g‘ildirakli velosipedda sayr qilayotgan videosi keng tarqaldi. Yaponiyaning Fuji telekanali bergan ma’lumotga ko‘ra, Layfu o‘z egasi tomonidan velosiped haydashga bir yil davomida o‘rgatilgan.
Videoda itning oldingi oyoqlari bilan rulni boshqarib, orqa oyoqlari bilan pedalni aylantirayotganini ko‘rish mumkin. Bu itning iste’dodi faqat velosiped haydash bilan cheklanmaydi.
Layfu skeytbordda uchishni ham o‘rgangan va bu ko‘nikmani bor-yo‘g‘i besh kun ichida egallagan. Ushbu noodatiy qobiliyatlari tufayli Layfu internetda katta qiziqish uyg‘otmoqda.
Jumladan, Amerikaning NowThis platformasi ham bu videoni ulashgan. Biroq, izohlarda turli fikrlar bildirilmoqda.
Ayrimlar itning bu holatdan noqulaylik sezayotganini ta’kidlab, egasini tanqid qilishgan. Ba’zilar esa hayvonni bunday mashg‘ulotlarga majburlashni noto‘g‘ri deb hisoblashgan.
Shu bilan birga, Layfuning qobiliyatlari ko‘pchilikda hayrat va qiziqish uyg‘otmoqda.
