Fransiyada yashovchi Dominik Valdes ismli ayol o‘zining Remi laqabli malla mushugi sababli sud tomonidan jarimaga tortildi. Bu haqda Zamin.uz xabar berdi.
Sud qaroriga ko‘ra, u qo‘shnisining mulkiga yetkazilgan zarar uchun 1,2 ming yevro to‘laydi. Bundan tashqari, agar mushuk yana begona hududga chiqsa, har safar 30 yevro miqdorida jarima to‘lashga majbur bo‘ladi.
Mahalliy nashrlarning xabar berishicha, tergov jarayonida mushuk qo‘shnining yangi suvoq devorini, adyolini va bog‘ini ifloslagani aytilgan. Ammo Valdes bu ayblovlarni rad etib, sudda aniq dalillar yo‘qligini ta’kidlagan.
U mahallada yana bir malla mushuk borligini va taqdim etilgan suratlarda turli mushuklar aks etganini qayd etgan. Hodisa ortidan qo‘shnilar yana ikki ming yevro miqdorida qo‘shimcha tovon talab qilib, yangi da’vo kiritishgan.
Bu esa Valdesni mushugini faqat uyda saqlashga majbur qilgan. U mushukning uy sharoitida o‘zini noqulay his qilayotganini aytib, bunday holatdan norozi ekanini bildirgan.
Mazkur voqea jamoatchilikda norozilik uyg‘otdi. Hayvonlarni himoya qilish jamiyati (SPA) sud qarorini tanqid qilib, mushuklarning tabiiy ravishda atrofni o‘rganishga intilishi tabiiy ekanini ta’kidladi.
Tashkilot rahbari Giyom Sanchesning fikricha, bunday qaror kelgusida hayvonlarni asrab olish jarayonini qiyinlashtirishi mumkin. Mahalliy aholining ham ushbu masalaga nisbatan munosabati salbiy.
“Mushuklar erkin harakatlanadi va ular ko‘pincha foyda keltiradi. Endi esa mushuklar uchun jazo qo‘llanilishi adolatdan emas”, — deydi to‘rtta mushuk egasi Natali.
