Braziliyada tornado: 5 kishi halok, 130 jarohatlandi
Braziliyaning janubiy Parana shtatida kuchli tornado sodir bo‘ldi. Bu haqda Zamin.uz xabar berdi.
Mahalliy hokimiyat bergan ma’lumotlarga ko‘ra, bu tabiiy ofat oqibatida kamida besh kishi halok bo‘lgan, 130 dan ortiq fuqaro jarohat olgan. Jabrlanganlarning ayrimlari og‘ir ahvolda shifoxonaga yotqizilgan.
Meteorologlarning ta’kidlashicha, tornado “supersel” deb ataluvchi xavfli bulut tizimi faollashishi natijasida yuzaga kelgan. Ayrim hududlarda shamol tezligi soatiga 250 kilometrgacha yetgani qayd etilgan.
Bu Fujita shkalasi bo‘yicha F2–F3 darajadagi tornado hisoblanadi. Tabiiy ofat natijasida yuzlab turar joy binolari, maktablar, savdo shoxobchalari va infratuzilma ob’ektlariga jiddiy zarar yetgan.
Elektr ta’minoti uzilib, ko‘plab yo‘llar yopilgan va transport harakati izdan chiqqan. Favqulodda vaziyatlar xizmati va harbiy qutqaruvchilar hozirda vayronalarni tozalash, jabrlanganlarni xavfsiz joylarga ko‘chirish ishlarini davom ettirmoqda.
Mahalliy hokimiyat zarar miqdorini aniqlash va tiklash ishlari uchun maxsus komissiya tashkil qilgan. Shu bilan birga, ob-havo mutaxassislari tornado sabablarini o‘rganish va kelgusida bunday ofatlarning oldini olish choralari bo‘yicha izlanishlar olib bormoqda.
