Suriya prezidenti Ahmad ash-Shara’a AQShga rasmiy tashrifini odatdagidan farqli tarzda boshladi. Bu haqda Zamin.uz xabar berdi.
U tashrifining ilk kunida sport maydonida bo‘lib, AQSh Qurolli kuchlari Markaziy qo‘mondonligi (CENTCOM) rahbari admiral Bred Kuper va uning o‘rinbosari admiral Kevin Lambert bilan basketbol o‘ynadi. Bu haqda prezident o‘zining ijtimoiy tarmoqdagi sahifasida ma’lum qildi.
Ash-Shara’a o‘z postida “Admirallar Kuper va Lambert bilan maydonda biroz mashg‘ulot o‘tkazdik”, deb yozgan. Ushbu harakat ijtimoiy tarmoqlarda katta qiziqish uyg‘otdi.
Foydalanuvchilarning fikricha, bu “yumshoq diplomatiya”ning ifodasi yoki siyosiy munosabatlarni noodatiy tarzda boshlashga qaratilgan do‘stona harakat bo‘lishi mumkin. Prezident Ahmad ash-Shara’a 8 noyabr kuni AQShning Vashington shahriga rasmiy tashrif bilan kelgan edi.
Tashrif doirasida u 10 noyabr kuni AQSh prezidenti Donald Tramp bilan uchrashdi va ikki davlat o‘rtasidagi muhim masalalarni muhokama qildi. Ma’lumot uchun, CENTCOM AQShning Yaqin Sharqdagi strategik harbiy masalalarni muvofiqlashtiruvchi qo‘mondonligi hisoblanadi.
CENTCOM rahbari admiral Bred Kuper sentyabr oyida Damashqqa tashrif buyurgan va Suriyaning yangi rahbari bilan ilk bor uchrashgan edi.
