Robert De Niro va Emin Agalarov yangi loyiha boshlaydi
Mashhur Gollivud aktyori Robert De Niro ozarbayjonlik tadbirkor va musiqachi Emin Agalarov bilan hamkorlik qilishni rejalashtirmoqda. Bu haqda Zamin.uz xabar berdi.
Emin Agalarov o‘zining ijtimoiy tarmoqdagi sahifasida Robert De Niro bilan birgalikda Nobu Hotel loyihasini amalga oshirish niyatida ekanligini ma’lum qildi. Mazkur loyiha Ozarbayjondagi Sea Breeze hududida amalga oshirilishi kutilmoqda.
Tadbirkorning so‘zlariga ko‘ra, u Robert De Niro bilan yaqin do‘stlik munosabatlariga ega va aktyorning kelasi yilda Bokuga tashrif buyurishi rejalashtirilgan. Shuningdek, Emin Agalarov O‘zbekistonda ham yirik turistik loyiha ustida ishlamoqda.
Ushbu loyiha doirasida Chorvoq suv ombori yaqinida zamonaviy dam olish maskani barpo etilishi mo‘ljallanmoqda. Loyihada plyajlar, mehmonxonalar, kottejlar, savdo markazlari, restoranlar, shuningdek, sport va dam olish maskanlari qurilishi ko‘zda tutilgan.
Mazkur loyiha uchun taxminan 5 milliard dollar miqdorida investitsiya yo‘naltirilmoqda. Bu loyiha mintaqaning turistik salohiyatini yanada oshirishga xizmat qilishi kutilmoqda.
