Mimikadan voz kechish: yangi go‘zallik trendi.

Zamonaviy go‘zallik standartlari tobora yangi qoidalarni joriy etib, odamlarni hayratda qoldirmoqda. Bu haqda Zamin.uz xabar berdi.

So‘nggi paytlarda hissiz, ya’ni mimikasiz yuz go‘zallik trendiga aylangan. Internetda yuz mushaklarini harakatlantirish o‘rniga ularni “muzlatib qo‘yish” haqida maslahatlar berilmoqda.

Bu haqda Peopletalk nashri xabar berdi. Hozirda yuzni yoshartirishga qaratilgan feysfitnes va gua-sha massaji kabi usullar o‘z o‘rnini statik holatga bo‘shatib bermoqda.

Ijtimoiy tarmoqlarda “toshdek yuz” usulini mashq qilish bo‘yicha qiziqish oshmoqda. Bundan tashqari, savdo maydonchalarida ajinlarning oldini oluvchi turli noodatiy moslamalar sotuvga chiqarilayotgani kuzatilmoqda.

Biroq tibbiyot mutaxassislari bu tendentsiyani jiddiy tanqid qilmoqda. Ularning fikricha, bunday trend haddan tashqari bo‘lib, hatto kulgili ko‘rinadi.

Dermatolog Andjali Maxto zamonaviy jamiyatda “botoksga qaramlik” yuqori darajada ekanini ta’kidladi. Har xil yoshdagi odamlar, jumladan, o‘smirlar ham yuzlarida paydo bo‘lishi mumkin bo‘lgan har qanday chiziqdan xavotirlanib, shifokorlarga murojaat qilishmoqda.

Masalan, aktrisa Megan Foksning yuzidagi “qotib qolgan” ko‘rinish ham botulotoksin in’ektsiyalari tufayli yuzaga kelgani taxmin qilinmoqda. Ushbu holat botoksning ortiqcha qo‘llanilishi yuz ifodalariga qanday ta’sir qilishi mumkinligini ko‘rsatadi.

Mutaxassislar bu kabi jarayonlar tabiiylikka putur yetkazishi mumkinligini ogohlantirmoqda.