Financial Times nashrining xabariga ko‘ra, Apple kompaniyasining bosh direktori Tim Kuk 2026-yilda o‘z lavozimini tark etishi mumkin. Bu haqda Zamin.uz xabar berdi.
Nashr ma’lumotlariga ko‘ra, uning o‘rniga asosiy nomzod sifatida apparat vositalari ishlab chiqilishini boshqarayotgan katta vitse-prezident Jon Ternus ko‘rilmoqda. Yakuniy qaror hali qabul qilinmagan bo‘lsa-da, Apple yangi rahbar nomini ehtimol, yanvar oyida moliyaviy hisobot e’lon qilingandan keyin ma’lum qiladi.
Yil boshida rahbariyatda o‘zgarishlar amalga oshirilishi kutilmoqda. Bu kelajakdagi bosh direktorga iyun oyida o‘tadigan dasturchilar konferensiyasi va sentyabrda rejalashtirilgan yangi iPhone taqdimotiga tayyorgarlik ko‘rish imkonini beradi.
Apple rahbariyatida kadrlar almashinuvi davom etmoqda. Joriy yilda kompaniyani moliyaviy direktor Luka Maestri yil boshida, operatsion direktor Jeff Uilyams esa yozda tark etdi.
Hozirda 65 yoshda bo‘lgan Tim Kuk 2011-yildan beri Apple rahbari sifatida faoliyat yuritmoqda. U Stiv Jobsning o‘rnini egallagan va uning boshqaruvi davrida kompaniyaning bozor qiymati 350 milliard dollardan 4 trillion dollarga yetdi.
Shuningdek, ma’lumotlarga ko‘ra, Apple Siri uchun sun’iy intellekt modeli bo‘yicha Google kompaniyasiga yiliga 1 milliard dollar to‘lashga tayyor ekanini bildirgan.
