Fransiya Ozarbayjonni mag‘lub etdi va yetakchilikni saqladi

Fransiya terma jamoasi JCH-2026 saralash bosqichi doirasida Bakuda Ozarbayjonni 3:1 hisobida mag‘lub etdi va D guruhida yetakchilikni saqlab qoldi. Bu haqda Zamin.uz xabar berdi.

Ushbu o‘yinda mezbon jamoa tarixiy gol urishga muvaffaq bo‘ldi, biroq ustunlikni qo‘lda ushlab qololmadi. Uchrashuv juda faol boshlandi.

To‘rtinchi daqiqada Ozarbayjon terma jamoasi hujumchisi Dadaşov Dashdamirovning uzatmasini muvaffaqiyatli yakunlab, hisobni ochdi. Bu gol Ozarbayjonning Fransiyaga qarshi o‘yinlardagi ilk goli sifatida tarixga kirdi.

Ammo fransuz futbolchilari javobni uzoq kuttirmadi. Gusto o‘ng qanotdan aniq uzatma berdi va Mateta bosh bilan darvozani ishg‘ol qilib, hisobni tenglashtirdi.

Birinchi taym o‘rtalariga kelib, Fransiya jamoasi to‘pni ishonchli nazorat qila boshladi. Gusto va Teo Ernandes qanotlarda faol harakat qildi, Nkunku esa chiziqlar orasidagi bo‘sh zonalarni ajoyib topib turdi.

Ikkinchi gol tezkor hujum natijasida kiritildi: chap qanotdan uzatilgan to‘p Gustoga yetib bordi, u esa darvoza oldiga aniq uzatma berdi. Aklyush bir zarbada to‘pni uzoq burchakka yo‘llab, hisobni 2:1 ko‘rinishiga olib keldi.

Taymning so‘nggi daqiqalarida Ozarbayjon darvozasi yaqinida standart vaziyat yuzaga keldi. Burchakdan uzatilgan to‘pni darvozabon Magomedaliyev muvaffaqiyatsiz qarshi oldi va to‘p rikoshet orqali darvozaga kirib ketdi.

Bu gol darvozabonning avtogoli sifatida qayd etildi. Ikkinchi bo‘limda Fransiya jamoasi o‘yinni pragmatik uslubda davom ettirdi.

Desham shogirdlari to‘pni nazorat qilib, hujumlar tempini o‘zgartirib turdi va raqibga jiddiy imkoniyat bermadi. Ozarbayjon esa faqat vaqti-vaqti bilan hujumga o‘tishga harakat qildi, biroq mehmonlar darvozasiga xavf solishga muvaffaq bo‘lmadi.

Natijada, Fransiya 16 ochkoga ega bo‘lib, D guruhida yetakchiligini davom ettirdi. Ozarbayjon esa bir ochko bilan to‘rtinchi o‘rinda qoldi.