Rossiya chegarasida to‘rt ming yuk mashinasi tirband bo‘ldi
Rossiyaning Xitoy, Qozog‘iston va Qirg‘iziston bilan chegarasidagi nazorat punktlarida to‘rt mingga yaqin yuk mashinasi to‘planib qolgan. Bu haqda Zamin.uz xabar berdi.
Bu mashinalar asosan import avtomobillarini mamlakatga olib kirayotgan haydovchilarga tegishli. Mutaxassislarning ta’kidlashicha, ushbu yo‘nalish Rossiyaga parallel importni amalga oshirish uchun asosiy kanal hisoblanadi.
Dilerlar fikricha, transport vositalarining uzoq navbatlari kamida noyabr oyining oxirigacha davom etishi mumkin. Chegaradagi vaziyat yanada murakkablashib, hatto "pullik navbat" tizimi paydo bo‘lgan.
Ayrim shaxslar maxsus botlar orqali navbatdagi o‘rinlarni sotishni tashkil qilgan. Tirbandlikning asosiy sababi esa 1 dekabrdan util yig‘imi oshirilishi kutilayotganidadir.
Yangi tartibga ko‘ra, yig‘im miqdori avtomobilning dvigatel hajmi va quvvatiga qarab belgilanadi. Faqat 160 ot kuchigacha bo‘lgan avtomobillar uchun yig‘im miqdori nisbatan past bo‘lib qoladi.
Shu bois dilerlar avtomobillarni oldindan mamlakatga olib kirishga shoshilmoqda.
