Ukraina Umerovning qochgani haqidagi xabarni rad etdi
Bugun, 17-noyabr kuni Rossiya ommaviy axborot vositalarida Ukrainadagi yuqori lavozimdagi shaxs, sobiq mudofaa vaziri va hozirgi Ukraina Milliy xavfsizlik va mudofaa kengashi kotibi Rustem Umerov mamlakatdan chiqib ketib, qaytib kelmasligi mumkinligi haqida xabar tarqaldi. Bu haqda Zamin.uz xabar berdi.
Ushbu ma’lumotlarga ko‘ra, Umerov xorijiy safarda bo‘lib, Ukrainaga qaytishni rejalashtirmayotgani aytilmoqda. Biroq, Ukraina tomoni bu xabarlarni rasman rad etdi.
Dezinformatsiyaga qarshi kurash markazi Rustem Umerov hozirda AQShda ekanini va u yerda ishchi uchrashuvlar o‘tkazayotganini ma’lum qildi. Shuningdek, Umerov mamlakat rahbariyati bilan doimiy aloqada ekani ta’kidlandi.
Qayd etilishicha, Umerovning qochgani haqidagi xabarlar Rossiya OAVda korrupsiya mojarosi bilan bog‘liq fonda paydo bo‘lgan. Mazkur mojaro ukrainalik tadbirkor Timur Mindich bilan bog‘liq bo‘lib, u Isroilga qochib ketishga muvaffaq bo‘lgan.
Mindich Ukraina ommaviy axborot vositalarida energetika sohasining soya rahbari sifatida tilga olinmoqda. Ma’lumot o‘rnida aytish mumkinki, Rustem Umerov 1982-yilda Samarqand shahrida qrim-tatar oilasida tug‘ilgan.
Sovet Ittifoqi qulaganidan so‘ng, uning oilasi Qrimga ko‘chib o‘tgan. U 2023-yilning sentyabr oyigacha Ukraina mudofaa vaziri lavozimida ishlagan, shuningdek, Ukraina Davlat mulki jamg‘armasi raisi sifatida faoliyat yuritgan.
