Markaziy Osiyo davlatlari – Qozog‘iston, Qirg‘iziston va O‘zbekiston – suv va energiya sohasida hamkorlikni kuchaytirish bo‘yicha yangi kelishuvlarga erishdi. Bu haqda Zamin.uz xabar berdi.
Muzokaralar 22-noyabr kuni Qozog‘iston energetika vaziri Yerlan Akkenjenov boshchiligida Olmaota shahrida o‘tkazildi. Tomonlar Toktogul suv omboridagi murakkab vaziyatni hisobga olib, qish mavsumida bir-birlarini qo‘llab-quvvatlashga kelishib olishdi.
Xususan, Qozog‘iston va O‘zbekiston qish mavsumida Qirg‘izistonga elektr energiyasi yetkazib berishni tasdiqladi. Bu esa Qirg‘izistonga elektr energiyasi ishlab chiqarishda suv sarfini kamaytirish va Toktogul omboridagi suvni saqlab qolishga yordam beradi.
Bahor va yoz fasllarida esa to‘plangan suv Qozog‘iston va O‘zbekistonga yetkaziladi, bu esa qishloq xo‘jaligi uchun zarur bo‘lgan sug‘orish ishlarini barqaror amalga oshirish imkonini yaratadi. Shuningdek, uch davlat energiyani tejash va ortiqcha iste'molni kamaytirish bo‘yicha hamkorlik qilishga kelishdi.
Mutaxassislar bunday hamkorlik mintaqaning energetik xavfsizligini oshirishga xizmat qilishini ta’kidlashdi. Uchrashuv yakunida tomonlar qish mavsumida yetkaziladigan elektr energiyasi hajmi va 2026-yil uchun suv zaxiralarini boshqarish rejasini tasdiqlovchi hujjatni imzolashdi.
Avvalroq, O‘zbekiston Suv va salomatlik bo‘yicha Protokolga qo‘shilib, iqlim o‘zgarishi oqibatlariga qarshi kurashda o‘z sa’y-harakatlarini kuchaytirgan edi.
