Oq uy vakilining qarindoshi deportatsiya qilinmoqda
AQSh Oq uyining matbuot kotibi Karolayn Livittning jiyani onasining qo‘lga olinishi mamlakatdagi deportatsiya siyosatining murakkab jihatlarini ko‘rsatib berdi. Bu haqda Zamin.uz xabar berdi.
Ma’lum bo‘lishicha, Livittning akasi Maykl Livittning sobiq rafiqasi, Braziliya fuqarosi Bruna Kerolayn Ferreyra turistik vizasi muddati tugaganiga qaramay, AQShni tark etmagan. Shu sababli u AQSh Migratsiya va bojxona nazorati (ICE) xizmati tomonidan hibsga olingan.
Ichki xavfsizlik vazirligi (DHS) ma’lumotlariga ko‘ra, Ferreyra 1999-yildan beri mamlakatda noqonuniy yashagan. Bundan tashqari, uning jismoniy zo‘ravonlikka aloqador bo‘lishi mumkinligi ham qayd etilgan.
Hozirda u Luiziana shtatidagi ICE hibs markazida saqlanmoqda va deportatsiya jarayoniga tayyorlanmoqda. Ferreyraning advokati Todd Pomerlo bu ayblovlarni rad etib, mijozining jinoyat sodir etmaganini ta’kidladi.
Uning so‘zlariga ko‘ra, Ferreyra bolaligida ota-onasi tomonidan AQShga olib kelingan va DACA dasturi ishtirokchisi bo‘lgan. Biroq, Tramp ma’muriyati dasturga qarshi chora ko‘rgan paytda, u maqomini uzaytira olmagan.
Hozirda Ferreyra AQSh fuqaroligini olish uchun qonuniy ariza topshirgan. Ferreyra 12-noyabr kuni Nyu-Gempshir shtatida o‘g‘lini maktabdan olib ketayotganida to‘xtatilib, hibsga olingan.
Sobiq turmush o‘rtog‘i Maykl Livitt bu vaziyatda o‘g‘lining ruhiy holati haqida qayg‘urayotganini bildirgan. DHS vakili esa DACA dasturi deportatsiyadan to‘liq himoya qilmasligini eslatib o‘tdi.
Ushbu holat, Tramp ma’muriyatining kuchaygan migratsiya siyosati hatto yuqori martabali amaldorlarning qarindoshlariga ham ta’sir qilayotganini ko‘rsatmoqda.
