Alibaba sun’iy intellektli aqlli ko‘zoynakni taqdim etdi
Xitoyning yirik texnologiya kompaniyalaridan biri bo‘lgan Alibaba Group 27-noyabr kuni sun’iy intellektga ega ilk aqlli ko‘zoynak – Quark AI Glasses’ni taqdim etdi. Bu haqda Zamin.uz xabar berdi.
Ushbu mahsulot ikki modelda ishlab chiqarilgan: funksiyalari kengroq bo‘lgan S1 va yengil G1. Alibaba vitse-prezidenti Vu Jianingning so‘zlariga ko‘ra, aqlli ko‘zoynaklar inson va kompyuter o‘rtasidagi muloqotni yangi bosqichga olib chiqishi mumkin.
Ushbu qurilma zamonaviy smartfonlar darajasida ahamiyatga ega deb baholanmoqda. S1 modeli 3799 yuan (taxminan 537 dollar) narxda sotuvga chiqarilgan bo‘lib, Snapdragon AR1 protsessori bilan jihozlangan.
Qurilma real vaqt rejimida tarjima qilish, to‘lovlarni amalga oshirish, navigatsiya va interaktiv yordamchi kabi funksiyalarni qo‘llab-quvvatlaydi. G1 modeli esa 1899 yuan (taxminan 268 dollar) bo‘lib, yengil va faqat asosiy funksiyalarni o‘z ichiga oladi.
Quark AI Glasses bozorda Meta’ning Ray-Ban Display ko‘zoynaklari, shuningdek, Rokid va Xiaomi qurilmalari bilan raqobatlashishi kutilmoqda. Meta ko‘zoynaklari rangli displeyga ega bo‘lsa, Alibaba mahsuloti monoxrom yashil ekran bilan ishlaydi.
Hozircha ushbu qurilma faqat Xitoy bozorida sotilmoqda. Xorijiy bozorga chiqarish rejalari haqida esa hozircha ma’lumot berilmagan.
