Rossiyadan Termizga to‘g‘ridan-to‘g‘ri reyslar yo‘lga qo‘yiladi
Rossiyaning "Azimut" aviakompaniyasi Rostov-Don shahridan Termiz shahriga to‘g‘ridan-to‘g‘ri parvozlarni yo‘lga qo‘yishni rejalashtirmoqda. Bu haqda Zamin.uz xabar berdi.
Ushbu yo‘nalishda reyslar haftasiga yetti martagacha amalga oshirilishi kutilmoqda. Bu haqda RBK nashri "Rosaviatsiya" ma’lumotlariga tayanib xabar berdi.
Shuningdek, aviakompaniya Rostovdan Tojikistonning Dushanbe va Xo‘jand shaharlariga ham haftasiga yetti martagacha reyslarni amalga oshirishni mo‘ljallagan. Uzoq xorijiy yo‘nalishlardan Iordaniya va Ummon davlatlariga parvozlar tashkil etilishi rejalashtirilgan.
Hozirda "Azimut" aviakompaniyasi O‘zbekistonning Toshkent va Samarqand shaharlariga muntazam reyslarni amalga oshirib kelmoqda. Milliy statistika qo‘mitasi ma’lumotlariga ko‘ra, 2025 yil noyabr oyining boshiga qadar O‘zbekistonga 852 ming nafar rossiyalik tashrif buyurgan.
Joriy yilning o‘tgan o‘n oyida mamlakatga jami 9,7 million xorijlik kelgani qayd etilgan bo‘lib, bu ko‘rsatkich o‘tgan yilga nisbatan 50 foizga ko‘pdir.
