Ukraina Moliya vazirligi xabariga ko‘ra, shanba kuni raketalar va dronlar yordamida uyushtirilgan hujumlar Kiyev shahri va viloyati, shuningdek, Chernigov, Sum, Poltava hamda Xarkov viloyatlaridagi energetika infratuzilmasiga katta zarar yetkazgan. Bu haqda Zamin.uz xabar berdi.
Natijada, Kiyev shahrida 500 mingdan ortiq aholi, Kiyev viloyatida 100 mingdan ziyod, Xarkov viloyatida esa 8 mingga yaqin iste’molchi elektrsiz qoldi. Hozirda barcha hududlarda elektr ta’minoti bo‘yicha soatbay cheklovlar joriy etilgan.
Bundan tashqari, sanoat va biznes subyektlari uchun ham elektr quvvatini taqsimlash bo‘yicha cheklovlar qo‘llanilmoqda. Energetika kompaniyasi DTEK ma’lumotiga ko‘ra, Kiyevning Obolon, Solomenka, Shevchenko, Podol, Goloseyev va Svyatoshin tumanlarida elektr ta’minoti uzilgan.
Mazkur hujumlarga Rossiya tomonidan rasmiy izoh berilmagan. Shuningdek, Rossiyaning Kursk viloyati gubernatori Aleksandr Xinshteynning ma’lum qilishicha, Ukraina zarbalari natijasida Rilsk tumanidagi energetika inshootlari zarar ko‘rgan va 600 kishi elektrsiz qolgan.
