3I/ATLAS kometasi yorqinligi 37 foizga kamaydi
3I/ATLAS deb nomlangan yulduzlararo kometaning yorqinligi so‘nggi bir necha kun ichida sezilarli darajada pasaygan. Bu haqda Zamin.uz xabar berdi.
Avval uning yorqinligi 10,1 yulduz kattaligida bo‘lgan bo‘lsa, hozir bu ko‘rsatkich 10,6 ga yetgan. Bu esa kometaning yorqinligi taxminan 37 foizga kamayganini anglatadi.
Ushbu ma’lumot Rossiya Fanlar Akademiyasi Quyosh astronomiyasi laboratoriyasi tomonidan e’lon qilingan. Mazkur holat g‘ayrioddiy tuyuladi, chunki kometa hozirda Yerga yana 10 million kilometrga yaqinlashgan.
Astronomlar bu pasayishni asosan kometaning Quyoshdan uzoqlashishi bilan bog‘lamoqda. Kometaning yorqinligi Quyosh nuri aks etishi bilan bog‘liq bo‘lib, yulduzdan uzoqlashgani sari uning nurlanishi susayadi.
Mutaxassislarning fikricha, yorqinlikning o‘zgarishi kometaning ichki jarayonlari bilan ham bog‘liq bo‘lishi mumkin. Masalan, kometa yuzasidagi fizik jarayonlar uning yorug‘likni aks ettirish qobiliyatiga ta’sir qilmoqda.
Shunga qaramay, 3I/ATLAS kometasi hozir ham osmonning eng yorqin kometalaridan biri hisoblanadi. Hozirda u taxminan 100 ta kuzatilayotgan obyekt ichida to‘rtinchi o‘rinda turadi.
Eng yorqin kometa esa C/2025 A6 (Lemmon) bo‘lib qolmoqda, garchi uning yorqinligi so‘nggi bir oyda o‘n barobarga kamaygan bo‘lsa ham. Astronomlar tomonidan olingan yangi suratlarda 3I/ATLAS kometasining dumida noodatiy o‘zgarishlar kuzatilmoqda.
Dumining "yirtilgan" shakli uning o‘zgaruvchan va g‘ayrioddiy tuzilishga ega ekanligini ko‘rsatmoqda. Hozirgi savol shuki, NASA yana o‘zining Hubble va James Webb teleskoplarini ushbu kometaga qaratadimi yoki yo‘q.
Ilgari NASA mazkur kometani suratga olgan, biroq u o‘shanda Quyoshdan ancha uzoqda bo‘lgan. Yaqin 2-3 hafta ichida obyektni xavfsiz kuzatish imkoniyati yuzaga keladi, ammo NASA hozircha yangi kuzatuvlar rejalashtirilganini e’lon qilmagan.
