Yevropa Ittifoqi Meta’ga qarshi tekshiruv boshlashi mumkin

Yevropa Ittifoqi Meta kompaniyasiga qarshi monopoliyaga qarshi tekshiruv boshlashi mumkin. Bu haqda Zamin.uz xabar berdi.

Financial Times nashrining xabariga ko‘ra, bunga Meta tomonidan o‘zining sun’iy intellekt texnologiyalarini WhatsApp messenjerida qo‘llashi sabab bo‘lmoqda. Manbalarga qaraganda, rasmiy e’lon yaqin kunlarda berilishi kutilmoqda.

Meta kompaniyasi WhatsApp’da chat-bot va sun’iy intellekt yordamchisini integratsiya qilgan. Ushbu texnologiyalar Yevropa bozorida 2025 yil mart oyidan boshlab joriy etilgan.

Shu yil yozida Italiya hukumati Meta kompaniyasini sun’iy intellekt funksiyalarini bozor ustunligidan foydalangan holda ilgari surishda ayblab, alohida tekshiruv boshladi. Shuningdek, kompaniya boshqa ishlab chiqaruvchilarning chat-botlariga cheklovlar qo‘yayotgani haqida ham ayblovlar mavjud.

Ammo Yevrokomissiya hozircha mazkur masala bo‘yicha izoh bermagan. Meta vakillari esa tekshiruvning boshlanishi haqida rasmiy ma’lumotga ega emasliklarini bildirgan va Italiya hukumatining ayblovlarini asossiz deb atagan.

Mazkur jarayon Yevropa Ittifoqining monopoliyaga qarshi siyosatini yanada kuchaytirishi mumkin.