Zelenskiy: Ukraina hududiy yaxlitligidan voz kechmaydi
AQSh tomonidan taklif etilgan 28 banddan iborat tinchlik rejasining mazmuni Ukraina bilan o‘tkazilgan muzokaralar davomida qayta ko‘rib chiqilib, 20 bandgacha qisqartirildi. Bu haqda Zamin.uz xabar berdi.
Bu haqda Ukraina prezidenti Volodimir Zelenskiy Bryusselga yo‘l olayotgan samolyotida jurnalistlarga bergan izohida ma’lum qildi. Zelenskiyning so‘zlariga ko‘ra, dastlabki variantda Kiyev manfaatlariga zid bo‘lgan bir qancha bandlar mavjud edi.
Yangi tahrirda ular butunlay chiqarib tashlangan. Prezidentning aytishicha, Ukraina manfaatlariga qarshi hech qanday bo‘lim qolmagan.
Shuningdek, u AQShning murosa yo‘llarini izlayotganini, ammo hududlarga doir masalalar bo‘yicha hali yechim topilmaganini qo‘shimcha qildi. «Bizning pozitsiyamiz qat’iy: Ukraina hech qanday hududidan voz kechmaydi.
Rossiya bunday talablarni qo‘yishda davom etmoqda, ammo biz buni qabul qilmaymiz. Aynan shu sababdan kurashyapmiz», — dedi Zelenskiy.
Prezident, shuningdek, xavfsizlik kafolatlariga ham to‘xtalib o‘tdi. Unga ko‘ra, Ukraina uchun eng ishonchli kafolatlarni AQSh taqdim qilishi mumkin.
Biroq bu faqat Budapesht memorandumi kabi «bo‘sh va’dalar» emas, balki AQSh Kongressi tomonidan tasdiqlanadigan hujjat bo‘lishi lozim. Zelenskiy tinchlik rejasini ishlab chiqish 9 dekabrga qadar yakunlanishini va hujjat AQSh tomoniga yuborishga tayyor bo‘lishini bildirgan.
Yevropalik maslahatchilar ham ushbu jarayonda Ukrainaga ko‘maklashmoqda. 4–6 dekabr kunlari Mayami shahrida Ukraina delegatsiyasi AQSh vakillari bilan uchrashuvlar o‘tkazdi.
Muzokaralarda Ukraina xavfsizlik kengashi kotibi Rustem Umerov, Bosh shtab vakillari, AQShdan esa prezidentning vakillari ishtirok etgan. Zelenskiy uchrashuvlarning oxirgi kunida onlayn tarzda qatnashganini va mazmunli suhbat o‘tkazganini ma’lum qildi.
Tinchlik rejasining kelgusi taqdiri AQSh va Ukraina o‘rtasidagi kelishuvga hamda Kiyevning o‘z hududiy pozitsiyalaridan voz kechmasligiga bog‘liq bo‘lib qolmoqda.
